بريق ...

السلام عليكم

مساءا حبيبة فى منزلها تعد العشاء
تسمع هاتفها



حبيبة: السلام عليكم
نادر: وعليكم السلام , ازيك يا حبيبة عامله ايه دلوقتى
حبيبة: الحمد لله بخير , انت اخبارك ايه
نادر: الحمد لله بخيرطول ما انتى بخير , كنت منتظره التليفون دا من فريدة صح؟
حبيبة: عرفت أزاى يا نادر, هى على طول كدا لسانها طويل
نادر: لا والله أبدا , انتى متعرفيش انا بعمل ايه معاها علشان اوصل لحاجة عنك
حبيبة: يااااه للدرجة يعنى
نادر: حبيبة أنا زى ما اكون برقبك من أول ما اشتغلتى فى الشركة معانا وأنا عارف عنك كل حاجة
حبيبة: ليه دا كله يا نادر, ايه خايف من المنافسه فى الشغل ولا حب استطلاع
نادر: طيب بلاش هزار النهارده وخلينى أكمل كلامى للاخر معاكى
حبيبة: ماشى اتفضل سمعاك
نادر: الاهم من انك تسمعينى انك تتكلمى وتحكيلى , انا هقولك كل حاجة دلوقتى
حبيبة: اوك اتفضل
نادر: كنت عارف عنك كل حاجة واى حاجة تحصل لكى او احس فى صوتك
او اسلوبك ان فى حاجة, اجرى على فريدة وأتذلل ليها انها تحكيلى
حبيبة: ليه دا كله يا نادر.

نادر: بعد وفاة والدتك , وبعد ما والدك اتجوز وانتى اخترتى تعيشى لوحدك
وانا حاسس بالخوف والقلق عليكى ولازم أسأل فريدة
ولو مضيقه ببقى مش طايق حالى وفريدة تايه مابينا وانا تعبتها معايا كتير
وطلبت منى كتير أنى احاول اكلمك انا بس انا كنت برفض,
كان دايما جوايا احساس ان فى حاجة احنا منعرفهاش ,
انتى معايا يا حبيبة؟؟؟

حبيبة: معاك يا نادر , بسمعك
نادر: يارب تكونى معايا فعلا , لانى معنديش اى استعداد انى تضيعى من ايدى ,
حاسس ان كان لازم اتكلم وافتح معاكى الموضوع دا دلوقتى ,
حاسس أن فى حاجة جرحاكى وتعباكى من جواكى , صح يا حبيبة؟

حبيبة: ممكن يكون في فعلا ...

نادر: وأنا مستعد انى اكون الضهر اللى تتسندى عليه , فات وقت كبير
على وفاة ماما ولازم تفرحى يا حبيبة انتى تستهلى كل الفرح والسعاده

حبيبة: نادر أنا مشــ...

نادر: حبيبة , مش عايز اسمع منك غير إجابة على سؤال واحد,
انا مستعد اتقدم ليكى من بكره وادخل البيت من بابه لانى حابب أصونك وأحافظ عليكى
حبيبة: سؤال ايه يا نادر

نادر: أنتى لسه بتحبيه؟
لو لسه يا حبيبة يبقى انا اتأخرت أوى انى اقولك وأنك كنت بتقصدى كل حرف
وكل معاملاتك معايا وانا كنت بحاول اوهم نفسى .
حبيبة: نادر انا كنت حاسه ان فى حاجة , كنت بشوف دا فى اسلوبك وكلامك معايا ,
كنت بحس بدا لما بشوفك توقف مع فريدة , فريدة عمرها ما اتكلمت معايا فى حاجة ,
انا فعلا كنت ساعات بهرب من الكلام معاك بس علشانى وعلشانك

نادر: حبيبة , لسه بتحبيه؟؟

حبيبة: !!!
نادر: لو كان قدر هو يضيعك من ايده ويخسرك فانا مش مستعد دا ,
وانا قادر اخليكى تحبينى مجرد انك هتحسى بحبى ليكى يا حبيبة

حبيبة: انت ليه بتقول الكلام دا كله, هو فى حد قالك حاجة زى دى؟
نادر: مش لازم حد يقولى , بس فترة تعبك زادت اوى وانك على طول شردة
وكأن جواكى جبل هموم , نظرة عنيكى والكسرة اللى فيها
لما قولت ليكى ان فى حد اتصل واظن انه مش عميل طبعا

حبيبة: أنــ...
نادر: كنت بحاول اعرف كل حاجة عنك من فريدة وانها دايما تسألك عن حالك
وأطمن عليكى منها, بس المره دى انا احساسى كان سابقاى كلام ممكن اسمعه من فريدة


هسيبك تفكرى يا حبيبة وهستنى منك انك انت اللى تحكيلى
وعلى العموم قريب هكون فى بيتكوا واطلبك من اهلك ,
لانى مش مستعد انى اخسرك يا حبيبة اعرفى دا كويس , لانى بحبك...

تصبحى على خير