OLiVeTrEe

welcome to my Blog

حبيبة_نادر


صباحا فى العمل

يدور حديث ما بين فريدة وحبيبة عن ما حدث بالامس

حبيبة: انتى ليه خليتنى اكون فى الموقف دا مع نادر؟
فريدة: والله هو قالى انا اللى هكلمها انا وسبينى انا افتح الموضوع معاها ,
فجأه كدا لقيت الموضوع كبر فى دماغه اوى
وبدل ما كان ساكت ومش حابب يفتح الموضوع اتشجع !!!
هو انتى قولتى ليه ايه
حبيبة: مدنيش فرصه اقول اى حاجة , وانا اساسا معرفتش اقول اى حاجة,
قالى خدى وقتك فى التفكير
فريدة: التفكير !! وفكرتى
حبيبة هو بيحبك اوى والموضوع من زمان وهو كان عايز يكون الكلام كله رسمى
علشان سمعتك فى الشركة وبرا الشركة كمان
حبيبة: طيب وانا يا فريدة , مش رأيى مهم بردوا وااحساسى بيه !!!
فريدة: اه طبعا انتو الاتنين مش هو بس , طيب انتى فكرتى؟
حبيبة: معرفتش افكر فى اى حاجة خالص , دماغى هتنفجر
فريدة: خدى وقتك والموضوع مينفعش الا لما تفكرى فيه كتير ,
وخدى بالك انه مش مجرد اى واحد, دا زميل عمل, بس فى الاول والاخر دا نصيب
حبيبة: ما دا اللى مخلينى مش قادره افكر فى حاجة ,
الموضوع بقى صعب اوى عليا من كل اتجاه
فريدة: صعب تلاقى حد بيحب حد فى الزمن دا كدا يا حبيبة...
حبيبة: ...

مر ثلاث ايام دون ان يفتح نادر النقاش مع حبيبة فى اى شىء
واصبح التعامل بينهم مقتصر على العمل
,هى لم تأخذ قرارها بعد, اما هو تركها حتى تفكر وتاخذ قرار نهائى وتبلغه به.


وبعد ثالث يوم
, نادر يتصل بحبيبة

نادر: ازيك يا حبيبة عامله ايه
حبيبة: الحمد لله بخير , انت اخبارك
نادر:انا كويس بس مسمعتش رد منك على طلبى ولا سؤالى يا حبيبة؟!!!
اعتبر دا رفض
حبيبة: كنت مستنيه انك تسألنى
نادر: والرد , حابب اسمعها منك حتى لو بالرفض بس علشان ارتاح ؟
حبيبة:نادر انا فكرت ولقيت انك بجد شخصيه محترمه جدا ومفيش زيك فعلا دلوقتى.
نادر: معنى كدا ايه
حبيبة: يعنى
نادر: يعنى ايه بقى
حبيبة: يعنــــــــــــــــــــــــــى
نادر: يعنى ايه بقــــــــــــــــــــى
حبيبة: صعب الاقى حد يحبنى زيك كدا وهتعب اوى علشان الاقيه , يلا بقى اكسب فيك ثواب
نادر: لا بجد يا سلام , كدا يبقى هتكسبى كتير اوى
حبيبة: طيب الحمد لله.
نادر: يضيقك لو سألتك عن حسام والموضوع كله ؟
حبيبة: أكيد يضيقنى , أنت قولت انى قد ايه كنت تعبانه وكنت حاسس بدا صح ؟
نادر: تمام
حبيبة: الموضوع دا اتقفل خالص ولو مكنش اتقفل من جوايا ومن كل الطرق
عمرى ما كنت هفكر اوافق على اى حاجة جديدة, لو مش واثق فيا يا نادر يبقى ...
نادر: لا متقوليش كدا , لا طبعا واثق وكان قدامى ازاى انك رافضه دخولك حياتك تانى ,
وكمان خلاص انسى ومش هسألك تانى عن الموضوع دا
وانا اقادر احافظ عليكى من اى حد او اى حاجة , انتى واثقه فى كدا؟؟؟
حبيبة: طبعا...



بعد اليوم التالى
حبيبة فى منزلها
حبيبة: الو ازيك يا بابا عامل ايه
والدها: الحمد لله بخير ياحبيبة , عاملة ايه يا بنتى
حبيبة: الحمد لله وازى صحتك ؟
والدها: الحمد لله بخير يا بنتى
حبيبة هو انتى ليكى زميلك فى الشغل اسمه نادر
حبيبة: اه يا بابا صح , عرفت ازاى؟
والدها: اصل هو كلمنى النهارده وبيقول حابب يزورنا فى البيت هو واهله , رأيك ايه ؟
حبيبة: انت رأيك ايه يا بابا
والدها: والله بدام داخل من الباب يبقى يتفضل , هو شخص كويس؟
حبيبة: اه يا بابا كويس ومحترم جدا وشخصيه محبوبه لكل الناس
والدها: الله ,,يبقى خلاص عرفت انا
على العموم انا خلاص هتصل بيه وهحدد يوم الجمعه الجايه ,
وربنا يقدم اللى فيه الخير يا بنتى
حبيبة: يارب يا والدى


يوم الجمعه فى منزل والد حبيبة
تجتمع العائلتين للتعارف وينتهى اليوم بسعادة كلا العائلتين بالتعارف
ووجود ترحيب كبير من والد حبيبة للموضوع والشخصيه وايضا اخواتها


بعد اسبوع , يتصل والد حبيبة بنادر يبلغه بموافقته على الخطوبة واتمامها بعد شهر...


تمت ... حبيبة

سؤال على السريع وبكره هقول رأيى انا بقى
للبنات... لو مكان حبيبة تحكى لنادر كل حاجة مرت ولا تكتفى بانه خلاص كان ماضى وراح لحاله؟؟؟
للولاد... لو كنت مكان نادر كنت هيبقى عندك فضول تعرف كل حاجة مرت بيها
وياترى كان هيأثر على مشاعرك او احساسك ناحيتها ؟؟؟

9 تعليقات اجمد ناس:

Shimaa يقول...

الحمــــد للــــــه "اول كومنت" :)

اولا القصة تجنن وكانت عجباني جدا لاني شيفاها واقعيه اوي وبتحصل كتيــــــــــر
بس انتي اخترتي الموقف وعملتي فيه الصح
لان للاسف مش كل اللي بيتحطوا في موقف زي ده بيتصرفوا زي حبيبة

انا شايفه انها كانت حاجة متوقعه ان ربنا يعوضها بحد يحبها بجد زي نادر
بدل الاناني التاني اللي عايز ياخد كل حاجه في نفس الوقت
حتى لو كانت حاجة مبقتش من حقه !!!!

بالنسبة لموقف حبيبة انا شيفاه صح 100%
لان الاخ الاولاني ده بقى مينفعهاش وكون انها تفكر تقرب منها تاني تبقى بتدمر حياته وحياتها
وانا من رأيي ان حياتها عندها اهم من حياته بكتير
لانه ميستاهلش اصلا تضحي بأي حاجة مهما كانت صغيره علشانه

بالنسبة بقى لسؤالك الاخير اولا واخيرا ده بيتوقف على اللي قدامك
يعني لو هو حابب يعرف عني حاجة زي كده اوك معنديش مشكلة هقول
بس اكيد مش هحكي تفاصيل لان الموضوع هيعمل مشكلة قدام
مهما كان اللي قدامك ده حد ناضج وواقعي وفاهمك وبيحبك

لكن في ناس نضجها اكتر وبتبقى عارفه اللي قدامها كويس
ورأيها بيبقى ان دي حاجة عدت قبل ما تعرفك فبالتالي ملهاش عندها ادنى اهتمام
وده اكيد احسن لانها بتبقى بالنسبالك صفحة مش عايزه تفتحيها لاي سبب
ولا حتى تفتكريها تاني الا علشان تتعلمي منها

وانا عن نفسي لو اتحطيت في موقف زي ده هحاول اعرف ع الاقل السبب اللي خلاه يسيبها
ومش هحاول اعرف تفاصيل مع اني عافة ان فضولي مش هيسيبني في حالي هههههههههه

ولو طلب مني احكي هحكي ....

أيا كان رأيي بقى فـ في ناس ليها رأي مخالف وهو انها حاجه خلصت خلاص ملهاش اي لزمة نتكلم فيها

وانا شايفه ان تصرفك بيعتمد على شخصية الحد اللي قدامك والرأيين يحترموا بصراحه.

morgana يقول...

وانا مالي بقي بعد ماكتبت الرد ما تحطش
:((

قولي للي اللي فوق تغير النسخه بقي بكره انا الكومنتات اللي مش في صفحه لوحدها دي

morgana يقول...

هو انا كنت قولت ايه؟؟؟

اه كنت بقول لو مكان حبيبه هقوله واللي يحصل يحصل
بس الراجل مطلبش يعرف التفاصيل يعني فخلاص

وهو بعد كده لو مش واثق فيها يبقي ملهاش لازمه الجوازه

القصه بح خلاص
بس نهايتها مش زي ما انا كنت رسماها بردو
تحياتي
:)
عقبال القصه الجايه

ЯậŇ MỗŘỹ يقول...

سلام الله عليكم و رحمته و بركاته
\\
للبنات... لو مكان حبيبة تحكى لنادر كل حاجة مرت ولا تكتفى بانه خلاص كان ماضى وراح لحاله؟؟؟
\\
اممممممم مش عارفه
لو الشخص ده كان عارف انى زمان كنت بحب ممكن أقوله بس مش بالتفصيل لو طلب هقوله انا ايه اللى عجبنى ف الشخص التانى
لو مش عارف أنا مش عارفه اعمل ايه؟
هقع فى براثن التردد زى هاملت *تو بى أور نوت تو بى*
ساعتها هكون *أقول أو لاأقول*
يمكن هحس انها خيانه أو انى شايله حمل تقيل جوايا لو ما قولتش
و ممكن برده أحس انها كانت حاجه زمان ذكرى و عدت و أنا خلاص اتغيرت و محيته من حياتى و الشخص اللى هرتبط بيه ده هبدأ معاه و هو راضى بيا من اللى شايفه دلوقت

زوزو
انتِ حولتينى لهاملت جديد
و بكده أصبحت سيادتك شكسبير الثانى ((:

Shimaa يقول...

@ morgan

مش هغير انا النسخة دلوقتي خالص
عاجبك بقى ولا مش عاجبك ؟؟؟

قولي متخافيش ......

ولعلمك انا شايفه عفاريت بترووح وتيحي قدامي دلوقتي
وانتي عارفه اللي انا فيه يعني D:
تحبي تحتكي بيا انهارده ؟؟؟ ولا خايفه على نفسك ؟؟؟ ;)

OlivE يقول...

//
ASI
//
يا سيدددددددددددددى
ايه الكلام الجامد دا
دا انا كدا اتغر فى نفسى D:



وبطلى فضول بقى
هيموتك يا بنتى الفضول دا:)


كلامك جامد ووجه نظرك تمام ولازم تحترم طبعا :)

منورانى دايما

OlivE يقول...

morgana

//
وانا مالي بقي بعد ماكتبت الرد ما تحطش
:((
//
معلش بتحصل كتير
:)

//
قولي للي اللي فوق تغير النسخه بقي بكره انا الكومنتات اللي مش في صفحه لوحدها دي
//
يااللى فوق اسمعى كلام طنط مورجن ونزلى نسخة :((


//
اه كنت بقول لو مكان حبيبه هقوله واللي يحصل يحصل
//
شديد من يومك :))


//
بس الراجل مطلبش يعرف التفاصيل يعني فخلاص
//
ما هو معنى انه بيسأل يبقى عايز تفاصيل


//
وهو بعد كده لو مش واثق فيها يبقي ملهاش لازمه الجوازه
//
هو دا الكلام متفقه جدا معاكى فى النقطه دى


//
القصه بح خلاص
//
اه شطبنا وقفلنا المحل

//
بس نهايتها مش زي ما انا كنت رسماها بردو
//
وانا مش شايفه انها لازم تنتهى بوضع مأساوى ما احنا نحاول نغير فيها للاحسن وهتبقى بردوا واقعيه
يعنى حاولى تبصى لنص الكوبايه اللى مليان


//
عقبال القصه الجايه
//
عقبالك عندك انتى وتنزلى لينا واحده كدا على ذوقك :)


منوره يا حبيبى

OlivE يقول...

روح تائبه
//
سلام الله عليكم و رحمته و بركاته
//
وعليكم السلام ورحمه الله وبركاته


//
انتِ حولتينى لهاملت جديد
و بكده أصبحت سيادتك شكسبير الثانى ((:
//
:))
شيكسبير !!!
وهاملت !!!!!!

صباح الروقاااااااااااااااااااااااااااااااااااااااااااااااااااااان


وحشانى يا بنتى خلينى اشوفك فى الكليه مره كدا قبل الامتحانات :((

!! a7mad sala7 !! يقول...

حلوة القصة

بس انتى شايفه ان الفترة اللى اتقدملها فيها بعد ما سابت الاولانى كافية انها تقفل الموضوع وتنسي
اكيد لا طبعا
النسيان مش بالسهولة دى .. كانت محتاجه وقت شوية
على الاقل عشان تدى اللى معاها حقه ومتبقاش ظلمته
ما علينا

بالنسبة للسؤال
انا لو مكان نادر
اكيد هيكون عندى فضول اعرف كل حاجة

ومخبيش عليكي .. لما اعرف اكيد هتأثر
غصب عنى مش بمزاجى
الولد دايما بيبقي عنده احساس انه عايز يبقي فتى البنت الاول وكل حاجة فى حياتها
طب والعمل..

هى لازم تقوله بردو لانه لازم يعرف كل حاجة عنها
عشان لو عرف حاجة من برا هى مقالتهاش هتبقي مشكلة كبيرة

هى اكيد لازم تقوله .. بس مش فى التوقيت ده
هى ممكن دلوقتى تديله فكرة عن الموضوع من غير تفاصيل
وتوعده ان الموضوع يكون اتقفل
ويكون اتقفل فعلا .. مش كلام بس

ولما يبقو يتجوزو وتعدى فترة تبقي تحكيله
على الاقل عشان ساعتها هيكون عارف انها ليه هو بس ومش ممكن تكون لغيره
وان الكلام فى الموضوع دا مات تماما

بس خلاص .. :)