HappY birth day ya shiMOo

kol sana w enty 6ayba ya shiMOo

w kol 20 sana w enty b5er w hana ya gamila

..............

دى حاجة بسيطه كدا

عمايل ايديا =))

يلا أى خدمة

بما انك هجرتى التدوين خالص

نحتفل احنا بعيد ميلادك بردوا

البلوجات لبعضينا D:

.....................................

.....................................

:)

:)

:)

:)

:)

:)

:)

بس بجد بجد متغلاش عليكى أنتى تأمرى واحنا ننفذ D:

D:
D:

نسيت أقول ان البتاعه دى ب100.000 دولار دولااااااااااااااار

وروان ناويه تدفع من الجمعيه اللى هتعملها قولى ان شاء الله

سلامى

Some words

السلام عليكم

لقد سئمت يداى من الضغط على تلك الازرة
قد سئمت عيناى من النظر إلى تلك الشاشة
لما تعطينى من أمل وهمى يدوم لبضع ساعات
وعندها لا أراهما أمامى فأجدنى قد أستيقظت
أستيقت على دنيا أحيا فيها دون تساءلات ,دون جديد فيها

وعندها أريد أن أغرق فى أحلامى مره أخرى
رغم سئمى من هذا الامل المتقطع
وتلك الضحكات المصطنعه لبعض الوقت
إلا أنها تكسر حاجة الصمت للحياة التى أحيا بها

ربما تكون متعتى الوحيده هى الجلوس ها هنا
إلا أننى وجدت أننى أصبحت فى عالم آخر
قد أنفصلت حياتى عن عالمى من حولى وربما تكون منفصلة من قبل هذا بكثير

لقد أستسلمت للحياة هنا فى إنتظار محادثة جديدة
او رسالة جديدة على الايميل
او معلومة جديدة أعرفها على أحد الاصدقاء
اوسماع موقف جديد قد حدث لأحدهما

نعم لقد أحببت دورالمستمع فى كل الاوقات ولا أشعر بالملل منه
احببت الاستماع فقط دون التحدث عنى فى أى شىء
وســـــــــــــــــــــــــــــــــــــــــــيدوم هكدا دورى

اممممممممممممممممممممممممم
شويه كلام حبيت اشخبط بيه شويه
ممكن يزعل ناس منى :(

سلامى

فلــــــــــــــــــوس سلف

السلام عليكم

بعد محادثه طويله عريضه مع مورجن

وبعد تعاطفها عليا وانها قررت انها تسلفنى مبلغ من المال

على سبيل السلف طبعا وانه لازم يترد

وإذ فجأه تقولى ثانيه واحده انا قولت هتحولى ايه الكرم دا البت دى هتعملها معايا

وإذ فجأة يا ساده الاقى صوره مبعوته ليا انا قولت شيك D:

وممكن تكون قررت انها بدل ما تشترى الفستاى ب9 مليون جنيه هتبعت ليا جزء منهم

وبعد ما عملت اكسبت للصوره واةةةةةةةةةةةةة يارتنى ما عملت

وتظهر ليا صوره عجيبه كدا

هى دى

اه هى دى والله هى دى :(

وكتبالى عليها( فلوس سلف) بتذلنى بتذلنى يعنى

قولت لازم اكتبها بوست للذكــــــــــــــــــرى

واشهد ياتاريخ مورجن سلفتنى 10 جنيـــــه مصرى لاغير

D: D: D:

حد يحب يشاركنى فيها أصلها كتيره عليا اوى خالص جدا

للمشاركة فى المبلغ اتصل على 000/000 000 0

كل ما تتصل اكتر فرصك فى المشاركه تزيد أكتر

خبـــــــــــر عاجل جدا اوى خالص+ تحديث صغنون

السلام عليكم


بـــــــــــــــــــــــــــــــــــــس
سكوووووووووووووووووووووووت
مش عايزه اسمع صوووووووووووت D:

بعد محادثات ولك كتير وكلام كتييييييير كدا
وبعد ما الموضوع فتحتوا شيمو وروان ومورجن وانا معاهم D:

قررنا نحن مدونى حاسبات ومعلومات الغلابه :)

انه يبقى فى لقـــــــــــــاء الاسبوع الجاى قبل ما الدراسه تتقل على الكل

واللقـــــــــــــــــــــــــــــــــاء أوبــــــــــــــــــــــــــن إن شاء الله

هيرجع بقى حسب الاراء والتعليقات والناس اللى تحب تشارك

والموضوع اوبن من النهارده لحد يوم السبت ان شاء الله

يعنى اللى حابب يقول تعليقه او يقترح حاجة او عجبته الفكره وحابب يكون حاضر

اتمنى يسيب تعليق

بالنسبه للمواعيد

الميعاد المقترح هو الثلاثــــــــــــــــــــــــــــــاء

أى اقتراحات أوووووووووووووووووووك

اى اعتراضاات ماشى ميضورش

فى انتظار الردود

وإن شاء الله يوم الاحد هنزل موضوع لو الميعاد وافق الناس

وووياريت الناس تقترح مكان داخـــــــــــــــــــــــــــــــل الكليه

سلامى

هندى هندى يعنى

السلام عليكم ورحمه الله وبركاته


أزيكم ... ازيكن

بقالى كام يوم كدا داخل عليا دور بعيد عنكم
الاوهو الدونلوووووووووووووووووود
الكمبيوتر بقى فاضيلى ومش بنزل جامعه
وانا مسيطره على النت كله محدش هيقولى
عايز الجهاز ولا قومى شويه ولا الكلام دا
لالالالالالالالالالالالالالالالا لوحدى
قولت هو دا وقت الانتقااااااااااااااام بقى
شغاله دونلود لافلام واللى يعجبنى اسمه والممثلين فيه ينزل بقى
مش على طول يعنى مش افترى هى فتره بليل ( ال ايه هو دا الوقت المتاح)


وإذ فجأة الاقى قدامى فيلم هندى
قولت اجرب وانزل الفيلم
أى نعم الفيلم ساعتين ونص
ومساحته 470 ميجا بس يلا نعمل ايه
ننزله وخلاص بقى بدام ضربت فى دماغى
والحمد لله نزل الفيلم

وامبارح قولت افتحه بقى واتفرج
بس اللى سألته لنفسى انا بعمل فى نفسى ليــــــــــــه كدا
انزل فيلم هنــــــــــــــــــــــــــــــــــــــــــــدى
ساعتين ونص لحد ما رقبتنى وجعتنى


الفيلـــــــــــــــــــــــــــــم اسمه My Name Is KHan
قصته يعنى لذيذه هندى بقى D:
بس عجبنى شويه حسيته من الافلام العربى القديمه اللى عندنا دى
الفيلم بيحكى شويه عن الاسلام والمسلمين والارهاب
شويه حاجات داخله فى بعضيها كدا
بس الحمــــــــــــــــد لله
قدرت اخلصه

ومن هنا استنتج أنى مستحيل أعملها وأنزل أى فيلم يزيد وقته عن ساعتين
أصل الواحد طاقات D: D: D:



هههههههههههههههههههههههههههههههههههه
أظاهر انى حسد نفسى أو حد حسدنى قبل ما انزل البوست
أصلى كنت بنزل فيلم دلوقتى وأتقطع النت :( :(
بس رجع تانى P: P: P: P:


يلا اروح اكمل الدونلوووووووووود
كانت معاكم زيتونه وحدها على الجهاز
بس هو لحد يوم الخميس بس :)

ليــــــــــــــــــــــــــــــه؟؟؟

السلام عليكم ورحمه الله وبركاته

موضوع فى بالى بقاله فترة
طبيعي لما اقعد ما بنات وفيهم مثلا واحدة مخطوبه
يبقى معظم كلامهم على العفش وجبتى ايه والاجهزه وصلتى فيها لحد فين

وجبتى كام طقم والصينى والبيركس وحاجات غريبه كدا

انا والله لحد دلوقتى معرفش اسمها ولا عايزة اعرف
فطبيعى انى اسمع يمكن اتعلم علشان اعرف اتكلم زيهم كدا
بس بصراحه فشلت

بس اللى مش طبيعى بقى وغريب ولحد دلوقتى نفسى الاقى ليه سبب
انك تلاقى بنت لسه مش مرتبطة وكل همها تجيب وتحتفظ من دلوقتى بحاجات

تنفعها لما تيجى تتجوز ومش بتكتفى بقطعه او
اتنين لالالالالالالالا يا مؤمنين دا بالدسته اللى هى 12 قطعه دى
ومفيش حاجة على لسانها غير انها جابت معرفش ايه جديد وتمنه .... وشافت

معرفش ايه وراحت جبته وخزنته ليها بعد كدا

أنا وجه نظرى مختلفه
تقدروا تقولولى ايه اللى يخلى بنت سنها لا يتعدى 19 سنه
يبقى كل تفكيرها فى هتجيب ايه وبكام وهتفرش شقتها بايه
وتكلف باباها ومامتها ايه ؟؟؟؟

انا نفسى الاقى اجابه تقنعنى ان دا غلط ومليون غلط كمان
انا مقولتش تكون هايفه ولا تافه ولا تبقى عبيطه ومش فاهمه
بس فى فرق ما بين انها تكون على وعى كامل بكل اللى بيحصل
والمتطلبات الموجوده فى حياتها بعد كدا ومابين الشره اللى ممكن تقع فيه بعد كدا لما ترتبط ...
مش الاهم من دا كله البنت تتعلم ازاى تخدم اهلها وازاى تساعد مامتها وازاى بعد كدا

تبقى ست بيت كويسه وتصون بيتها
وتتعلم سلوك التعامل لان أكيد البنت فى بيت أهلها شىء وهى بنت ومسئولة شىء تانى خالص

وكتير سألت نفسى
هو انا لما اجى وربنا لو رزقنى وارتبط هيبقى كل همى انى اخلص على فلوس اهلى

قبل ما امشى واخليهم يداينو علشان ادخل مش ناقصنى حاجة وللاسف لما بسمع الالوف

اللى بتترمى فى النيش بتخض وبزعل والله وساعتها برضوا بسأل نفسى

نفس السؤال هو دا حلال ولا حرام ؟؟؟

طيب مثال تانى
واسفه على ذكره بس استفذنى لما ماما حكته ليا
الموضوع ان فى بنت حالتهم الماديه مش كويسه اوى او تكون عاديه
مامتها بتروح مثلا تشوف الناس المقتدره انهم يساعدوهم بحاجة
دا شىء جميل انا مقولتش حاجة ودى حاجة تسعدنى طبعا عمل الخير فى موضوع زى

دا مفيش افضل منه وكمان انك تساعد بنت يتيمه انها تتجوز
بس اللى مش طبيعى ان الطلب اللى بتطلبه ان البنت جابت 11 قطعه مش فاكره ماما

قالتلى ايه بالظبط والله ونقصها قطعه كمان يوصل تمنها يعنى مش كتير 200 جنيه

علشان تكمل 12 قطعه

أظن اللى عايزه أوصله وصل ليكم
إيه اللى يخلى بنت تفكر بالمنطق دا الا وهو التقليد الاعمى
أصل معرفش مين جابت يبقى لازم أجيب زيها وأحسن منها
...................

قيسوا كل الكلام دا بس لو طبقناه على مثال لاى شاب وعمل كدا مع اهله كل همه

يبقى شقته كامله من كل حاجة باركيه تشطيب لوكس فى كل حاجة ومش مهم

يجيبوا منين وكلوا برضوا تقليد أعمى

أنا مقولتش ان البنت مش تبنى بيتها بكل حاجة بس الحاجة اللى هتفيدها
وان الولد مش يتمنى يكمل شقته بأحلى مظهر ويكون بيت متكامل
بس بالعقل ( خبطوا بالعقل )
بلاش نفترى بلاش يبقى كل همنا الفلوس
بلاش نمص دم اهلنا وخلاص واحنا عارفين حالهم وحياتهم
فى ناس مقتدره تجيب وتعمل
وناس تانيه لا

الافضل كل واحد يمشى على قد ظروفه ومقدرته

شوية رغى كتيررررررررررر أنا عارفة

يلا سلام بقى علشان أروح أنام أصلى لسه منمتش

تصبحوا على خيررررررر :)

جت متأخره بس معلش :)

السلام عليكم ورحمه الله وبركاته

خلاص قريب

خلاص قريب هاجى وافرح
وهقولها باعلى صوت
مبروك
مبروك علينا وعليكم
ويارب دايما البسمه ما تفارق شيفاكم

واخيرا فكت نحسنا زهرتنا
وفى شهر سته تتزين ايدها
وفيها هفرح مووووووت
وبكــــــــرة هى تفرح فينا
مبروك عليكى يا زهرتنا
مبروك عليك يا عمرو صحبتنا
خلى بالك عليها وبحنانك اسقيها
دى احلى زهره فى بستان حياتنا

......................

بجد مش عارفه اكتب

بقالى فتره هموت واكتب حاجة ليكى يا زهره

بس للاسف دماغى مش مجمعه خالص ولا الحال مساعد

بس من غير ما اكتب او اقول انتى حاسه بفرحتنا بيكى

وسعيده جدا وكان امنيتى فعلا تحصل حاجة قريب

والحمد لله ربنا وفقك وحصلت فعلا :)

ربنا يتمم ليكى على خير ويبارك فيكم يارب

وفى شهر 6 اجى احضر الخطوبه ان شاء الله

اخيرا اتفك نحسنا يا بنتى على ايدك :)

بجد كان نفسى اكتب حاجة باسمك واكتبها فى البلوج تانى

بس ان شاء الله هيحصل يارب بس اقدر دى حاجة بسيطه

ارتجلتها دلوقتى مش حلوه انا عارفه :(

مبروووووووووووووووووووك :)

حاجة المفروض تتكتب من فتره بس جت متاخره شويه

سلامى

شويه كلام غير اللى فات

السلام عليكم ورحمه الله وبركاته

اه خلصت الاجازه
مبروك ترم جديد هيبدأ(معرفش مبروك ليه يعنى)
وإن شاء الله يكون الاخير عليا...

بعيدا عن الدراسه شويه
هــــى ليه كل الناس مضيقه وزعلانه ؟؟
كل ما ادخل بلوج او افتح اى صفحه نت الاقى زعل وضيق
بس بحس ان اننا مش لوحدى اللى زعلان ومضايق وهيطق ...

أظاهر انى الزعل والاكتئاب بقت حاجة مسيطره على كل حياتى
او انا بطلب المستحيل ... الله اعلم بس اللى انا متاكده منه انى
صاحيه وشايفه كويس وعارفه انى طلبى مش صعب...

نفسى الاقى الصدق والصراحه والاحترام ما بين الناس
الناس بقت عجيبه اوى كل حياتهم يا تفاهه جامده اوى
يا حاله تشائم ماليه وجوهم وقرفانين من نفسهم حتى ...

نفسى الاقى الوسطيه ... بس انا مقتنعه انها اختفت
مره اتناقشت انا اخويا هو مصمم ان الوسطيه دى هى
الاساس للحياه والقاعده وبيتفرع منها الباقى
رديت عليه ان الوسطيه فى الزمن دا اتعمل ليها شيفت دليت ...

عارفين اكتر حاجة بضيقنى وبجد بتخنق منها الوعود
مبحبش حد يدى وعد وهو مش قده يووووووه مش بطيق نفسى
اللى يدى وعد لازم يكون طالع من جواه وهو فى نيته فعلا يحققه
مش اى كلام وخلاص فى الهوا ...

شهر 2
النهارده 19/2
اكتر شهر مش بحبه هو شهر 2
حصلت ليا فيه ظروف وحشه اوى
ومش فى سنه واحده دا على مدار كام سنه كدا
منهم 2/2/2001
و18/2/2007
أكتر تاريخ مش بحبه بس دا قضاء ربنا الحمد لله على كل حال
يارب بقيت الشهر يعدى على خير لانى مش مطمنه للى ممكن يحصل
خاصا الظروف اللى هتمر علينا الكام يوم اللى جايين دول ...

هى الوحدة فعلا بتقتل ؟؟؟
أظن الاجابه انا عرفاها دلوقتى ومجرباها...

?

WHY ...ME

.

.

WHY...ME

.

.

WHY...ME

???

.

.

نفسي الاقى اجابه لسؤالى

:(

السلام عليكم

هو الموضوع صعب اوى كدا؟؟؟

.........................................

لا مش عارفة أكتب حاجة

ياريت الكلام يعبر ياريت

بجــــــــــــــــــــــد ياريت

الحمد لله على كل حـــــــال

الحمد لله

:(

:(

يارب

شويه كلام كتير

السلام عليكم
---------------------

ازيك يا بلوجى
ويارب يكون النيولوك حلو ( مش اوى يعنى )
بس هو على قدى بقى...

بكـــــــــــره ان شاء الله يوم مش عادى عندى
يارب اكون قد المسئوليه فيه ويعدى على خير
خايفه بس دا نصيب ولازم نمر بيه
ان شاء الله الموضوع هيكون سهل ومفيش تعب
لحد باذن الله بس نجمد قلوبنا شويه ...

أه اجازه نص السنه خلاص بتنتهى
وكان عندى مشوار كنت عايزه اعمله اخر
يوم فى الامتحانات بس أجلته وللاسف
لحد النهارده مقدرتش اعمله
بس هو فى بالى على طووووووول
وبجد نفسى اعمله بس غصب عنى مش قادره.

دلوقتى حالا نفسى اعمل حاجة واحده
نفسى أخرج كل تعبى من جوايا
بصراحه نفسى أحكى ومحدش يقولى
بطلى كلام او يزهق منى ...

كتير مخنوقه ومضيقه
بس تصدقوا انى مبقتش استنى سؤال مالك؟ من اى حد
وبقيت بستغرب لما اسمعه من حد والرد المعتاد مفييييش حاجة
الحياه تمام اهو ومنعشه وضحكه من تحت لتحت تنسى اللى قدامى
يسال تانى او يصر على سؤاله...

ههههههههههههههههههههه
بتهيألى بقالى كتير مسمعتش مالك من حد؟؟؟
ورديت عليها بكل اللى جوايا.
اصل انا مبقتش اعد ولا استنها من حد
خلاص تعبت من كتر ما بستناها
واظاهر انها زهقت منى وبطلت تتقال ليا
وأنا مبقتش استناها بحاول لما افتكرها افكر فى اى
شىء تانى فى وقتها على طووووووووووول :) ...

ساعات كتير بنندم على دموع نزلت على حاجات مكنتش تستاهل
وساعتها بتنزل دموع تانيه
يعنى دموع ندم على دموع سبقتها .

ساعات لما بنحس ان فى هم طابق على صدورنا لدرجه اننا مش قادرين
نتنفس بنلاقى دموعنا بتسبق المنا من جوانا.

ساعات بنضحك بعلو صوتنا علشان ندارى جرح فى قلوبنا
او نخبى دمعه فى عيونا ونبص للسما علشان دمعتنا متسبقناش
على خدودنا .

ساعات بنهرب من مشكلتنا لمشكله أكبر بايدينا وارادتنا
ممكن للعند ممكن للضعف ممكن للكبر اننا نعترف بأخطأنا .


بصراحه خايفه من بكرة ... ربنا معايا ومعانا ان شاء الله


خلص الكلام منى

سلامى

اس ام اس

سلملى علــــــــــــــــــــــــــــــــــيه

روح قيله غيره ما بحكى

تسلملى هايدى الضحكه

شو بحبك

واسالو بركى

عل حااااااااااااااااااااااله

على حاله بعده على الفارقه

وبيحلم مثلى بالملقى

او بُختر حتى لو سرقه على باله

...........................

سلملى عليه

روح وهايدى العنوان

شوفلى ان كان مو زعلان

او غيرى على قلبه ابتدى ؟؟؟

..............................

روح قله غيروا ما بدى

مين حبه بالدني قدى

وديله هالعمر ودى بسلااااااااامى

-----------------------------

حلوه الكلمات دى أوى

:)

سلامى

لا ليه ؟؟؟

محدش يسلفنى نضارته

اي جوووووووكم

اي جوووووووووكم

:)

الحكمة فى الفطرة

السلام عليكم ورحمه الله وبركاته

قال حكيم

في الأطفال سبع خصال

لو كانت فى الكبار لسعد حالهم

1- لا يغتمون للرزق.

2- إذا مرضوا لا يشكوا لخالقهم.

3-يأكلون الطعام مجتمعين.

4- إذا تخاصموا لم يتحاقروا.

5- يسارعون إلى الصلح.

6- يخافون بأدنى تخويف.

7- أعينهم تدمع بدون خجل.

سلامى

+++++++++++

BACK

http://olivetree-teba.blogspot.com/

يا نفسي

الحكاية ومافيها _2

السلام عليكم ورحمه الله وبركاته

أتحدد ميعاد الفرح
جهزت الشقه بالعفش

وقبل الفرح ب4 ايام قرر محمد يسافر علشان يأخد أجازه الفرح من شغله ومكان شغله كان بعيد جدا كان في مرسى مطروح.
وأخد أجازة أسبوعين للفرح وحدد يوم الثلاثاء للرجوع لأهله
علشان يجهز بقى مش العريس ولازم يرتب شقته ويظبط الامور

كان لازم الاهل يستعدوا استعداد الفرح والعادات اللى كانت

موجوده فى الوقت دا لكن أم محمد رفضت تجهز اى شىء

من حاجات الفرح الا لما ابنها يوصل بالسلامه وتطمن عليه

وجه يوم الثلاثاء فى انتظار العريس
والعريس موصلش وفى انتظاره لاخر اليوم بس بردوا موصلش ...
وعدى اليوم قالوا يبقى أتاخر وأكيد هيوصل بكره الصبح.
و ما زالت والدته متحكمة أنها تستني ابنها لما يوصل وتتطمن عليه ...
وبقينا يوم الأربعاء يوم الحنة وبرضوا موصلش اى خبر عنه

أو اى اتصال منه

وفى منتصف يوم الأربعاء الباب خبط
سامى:مين؟؟
سعيد:أنا سعيد صاحب سامي (أخو محمد الكبير)
سامى:تعالى يا سامي عايزك
سعيد:خير يا سعيد
سامى:بس تعالا هبط بالصاعقة على سامي
سعيد:فى خبر وصل لعمدة البلد أن محمد توفى في حادث أتوبيس

وكان لازم حد يبلغك ومحدش قدر يبلغك الخبر

وطلبوا منى أنا اللى أبلغك ..
سامى:أزاى ؟؟!!!!!!!!!
سعيد:الأتوبيس اللي كان راجع حصل تصادم ما بينه وبين عربية

محمله بنزين وغاز ومفيش حد نجي منه خالص غير شخص واحد,

بقاء لله يا سامى .

طبعا الفرح اللي كان هيبقى موجود في البيت بعد 24 ساعة أتقلب مآتم واتبدلت كل لحظات الفرح والابتسامات إلى حزن شديد وبكاء
وبدل من تقديم برقيات الفرح والزغاريط انقلب إلى عزاء وحزن على محمد ...

بعد فتره شهر من الوفاة

طبعا أهل العروسة مش هاديين ومش عارفين مصير بنتهم إيه

وكل شويه فى كلمه للبلد وما أكثر الكلام اللى ممكن يتقال

فى الاوقات دى..

وعلشان سامى يخلص من كلامهم لان الوقت غير مناسب للكلام دا
قال ليهم لو عايزين حق بنتهم يجوا يأخدوه
وفعلا بعد شهر تقريبا من الوفاة أخدوا كل العفش من الشقه
بدون أى شعور بالمصيبه اللى فيها أهله .
وفعلا اخدوا كل العفش وخلو الشقة زى الصحراء
, مقابل حقها فى جوزها ..

ولان الحاجة بتزعل على صحبها ,الشقه أتغير لونها
إلى شقه باهتة اللون حزينة على صاحبها وفراقه ليها .
يمكن فى ناس مش هتصدق كلامى دا وتقول أن دا مش حقيقى
, بس عن تجربة فعلا الحاجة بتزعل على صاحب البيت
ولو حصل أى حالة حزن بتحزن هى كمان ..
...............

أنا هقف لحد هنا مش هكمل
هسيب عقولكم وتخيلاتكم هي اللي تحدد ليكم حاله الأم

والبيت بعد كدا بقيت ازاى

وازاى إن البيت دا مدخلوش اى طعم للفرح وكأن الحزن بقى

شىء أساسى فى كل المناسبات ومن كتر جراحهم لما بيفرحوا

بيبكوا مش حب للجرح أو الحزن ولكن الله أعلم ..

هسيب كل واحد يفكر إيه اللي ممكن يتعلمه من الحكاية .
وهحب اسمع أقراكم في الحكاية
و لو أنت بعد الشر عن اى حد قريب منكم مكان اى حد

كان قريب من محمد كان ممكن رد فعلك إيه وتأثيرها عليك ...

نسيت أقول أن محمد ادفن في مرسى مطروح بعيد عن أهله في نصب للجندي المجهول
لأنهم طبعا كان صعب يتعرفوا على الجثث من تشوهها ..
ونسيت أقول أن البنت اللي ارتبط بيها بعد الوفاة بفترة خلعت النقاب خالص وبقت عادى جدا والميكاج بقى طبيعي عندها أنها تخرج بيه ...

أنا آسفة على الحكاية بصراحة انا مكنتش عايزة اكملها خالص حسيت أن غلطانه أنى حكيتها لانى عارفة أنها حزينة
بس حبيت اذكرها هنا ممكن للعبرة أو للعظة يمكن رسالة لينا كشباب وفتيات ...

سلامى

just word

الموضوع مش مستاهل

...

كل شويه invisible

...

كل شوية invisible

...

كل شويه invisible

...

:(

الحكاية وما فيها+تحديث فى الاحداث

بسم الله الرحمن الرحيم

الحكاية اللي عايزة احكيها النهاردة حصلت فعلا
حصلت من 18 سنه تقريبا
بس مبدأيا كدا اللي مش عايز يضايق بلاش يقراها خالص

ويلغى البلوج دا من عنده علشان بس الدنيا مش ناقصة كآبه خالص
( اموشن حد خجلان وحاسس أن الناس هتولع في البلوج دا قريب)
بس أنا لم ولن اسمح بلوجي هيفضل زى ما هو كدا نكدي من يومه ...

الحكاية وما فيها

كان في اسره بسيطة جدا من الأرياف

بتتكون من أب وأم وولدين وبنتين
أكبرهم سامي و تانيهم وتالتهم البنتين ورابعهم محمد
بطل الحكاية هو محمد أو حمادة زى ما كانوا بيحبوا ينادوه
محمد هو اصغر أخواته زى ما قولت خلص التعليم بمؤهل متوسط.
وزمان فى الأرياف كان التعليم ومستوى التعليم مكنش زى دلوقتى
خلص تعليمه والتحق بالجيش , زمان كان الجيش غير دلوقتى

فعلا مكنش هم الناس هي الفلوس زى ما الناس بدور دلوقتى

وكل واحدعايز يدخل ابنه الجيش علشان مرتباهم كويسه

وبيعرفوا يقضوا مصالحهم ومحدش يقولهم حاجة
..

محمد كان من النوع المثقف جدا وكان بيحب يقرا في الفقه والدين

والكتب الدينية وكانت الناس تعرف عنه الاحترام والأخلاق

والعفة في كلامه .

ومرت الايام والسنين ...

ووصل محمد لسن 28 سنه وقال عايز أتجوز فضل

يدور يمين وشمال لحد ما ربنا رزقه بـأهل بيت, ناس كويسه

وكان الأب راجل ملتزم وكويس وأكيد البنت هتبقى كدا هي كمان .

عجب محمد الموضوع وأتقدم ليها وخطبها وبدأ يجهز شقته للجواز

وطول فتره الخطوبة كان في زيارات طبعا لبيت العروسة

ومن اكتر الحاجات اللى شدت محمد للموضوع هو انها بنت

ناس ملتزمين ولابسه نقاب وكان مستحمل اى شىء علشان

هو شارى البيت ..

ولان زمان كانت المرتبات على الأد والناس تعبانه فى عيشتها

فكر محمد فى فكره انه يطلب نقله في مكان بعيد

ودا بيزود من مرتبه كام جنيه ينفعوه بعد كدا في المستقبل .

ولانه مش بيحب فتره الخطوبه تطول قرر كتب الكتاب

وفعلا كتب الكتاب ولما كان والدها بيطلب منه قايمه
كان رده ( قايمه ايه اللى هتمضينى عليها دا بنتك كلها هتبقى

معايا هى الورقه دى اللى هتضمن ليها حقها منى وكمان لو عايزه

تاخد كل حاجة لو محصلش نصيب تاخدها )

ورفض رفض تام انه يمضيها .

وعلشان ينهو الاشكال على القايمه قرر والدها انه ياخد شيك

بمبلغ 10000 جنيه لحد ما تتم الجوازه ويبدأو يجهزوا بنتهم

واللى وافق يمضى على الشيك هو الاخر الاكبر سامى

وبكدا نسيوا موضوع القايمه شويه ...

لكن قبل الجواز بشهرين توفى ابو محمد وطبعا كانت حاجة محزنه

انهم يفكروا فى الارتباط دلوقتى .
بس محمد قرر يتجوز بسرعه

ولانه هو مش هيعمل فرح وبدام كل حاجة خلصت...

يتجوزوا

وبعد شهرين من وفاه والده أتحدد ميعاد الفرح

فى يوم 18/6/1992

....

ونكمل بعدين

سلامى

خلاويص ...لسه

بسم الله الرحمن الرحيم

أعتبــــــــــــــــــــــــــــــــــــــــــــروا

تـــــــــــــــــــــــــــــــــــــــــــــــــرم

وراحـــــــــــــــــــــــــــــــــــــــــــــ

نرجع بقى لطبيعتنا بقـــــــــــى

الواحد وحشه المواضيع الكئيبه

اللى كان بينزلها p: (بغيظ حد )

بس النهارده كان يوم حلو اوى

كانت فسحه ظريفه ولذيذه مع احب

ناس على قلبى لانى بحبهم لله فى الله

الجروب دا

بس محصلش نصيب نكمل

مع بعض فى قسم واحد .

بس كان وحشنى اوى جنانهم ودماغهم

ربنا يوفقنا جميعا

ويارب الترم دا مش يتكرر تانى

والترم التانى يكون حاجة احلى

لان الواحد كان على آخره الترم دا

اه الترم التانى اصعب ...اوك

بس ميكونش بالغباء دا وعلى اللى شوفناه من استعباط

معانا من اول حد لاخر حد فى الكليه

يلا خلاص ننسى بقى الترم دا

لحد ما تظهر النتيجه :(

وتتجدد الذكرى :)

ربنــــــــا يستر

سلامو عليكو