شويه كلام زى زمان

بسم الله الرحمن الرحيم



من كام يوم فاتوا وانا عماله افتكر انى مريت بالحاله دى قبل كدا

وساعتها افتكرت انى كنت مريت بنفس الحاله دى من 4 سنين

فى 3 ثانوى كان سنه من اسوء سنين عمرى والحمد لله

عدتت كانت سنه وحشه اوى كان كلها زعل وعياط وتعب

مكنتش بعمل حاجة فى حياتى غير انى بروح دروسى

ارجع اقفل على نفسى الاوضه واعيش مع حالى

حتى المدرسه مكنتش بروح على اساس اقعد فى

بيتنا علشان اذاكر بقى واجيب مجموع كويس

يرفع من مجموع تانيه وندخل بقى الكليه اللى نفسى فيها

وهى فعلا اللى دخلتها بس مجموعى نزل مش زاد ودخلتها برضوا

الحمد لله بس كانت سنه وحشه اوى



وتقريبا كان نفس التوقيت اللى احنا فيه دلوقتى فى شهر 12 لحد

شهر 4 و قولت لا انا لازم اذاكر ومضيعش مستقبلى

اى نعم الحاله متغريتش خالص و اى نعم فضل حالى زى ماهو و

اى نعم مضعشى الحلم بس وقتها قفلت على نفسى اكتر

وقدرت اذاكر واعدى اه مجموعى نزل شويه

بس ربنا سترها ومنزلش اوى والحمد لله فرحت

انى دخلت الكليه اللى كان نفسى فيها وفرحت امى واخواتى معايا

والحمد لله محدش شمت فيا ودخلنا الكليه

ويارتن... مبحبش كلمه يارتنى دى

بس كل ما صحبتى تقولى 3 ثانوى وتفكرنى تسكت

وتقولى خلاص خلاص عارفه انها كانت سنه وحشه عليكى

بس بتفكرنى بحاجات متتنسيش درس الساعه 6 ونصف الصبح

واللى كنا بنعمله بعده من اكتر الحاجات اللى بفتكرها دلوقتى

واضحك عليها :)



المهم وصلنا ل4 جامعه يااااااااااااه بكالوريوس ياناس

وكلى حماس من اول الترم هنعمل وهنشتغل بقى

ومشروع بقى وكلام من دا ولقيت الجو نايم على الاخر


منى ومن زميلى ومن الكليه وانا كمان نمت وضاعت

كل القوه والحماس اللى كان جوايا بالعكس بقيت محبطه

ومحبطه لاى حد ممكن يتكلم معايا علشان كدا بطلت اتكلم مع الناس ...


يمكن اكتر حاجة تعبانى دلوقتى المشكله اللى ظهرت تانى دى

اخلص منها ازاى طيب ما ممكن زى ما خلصت منها زمان من

4 سنين اخلص منها دلوقتى


للاسف انا مخلصتش منها زمان بس تناسيتها شويه كدا

وكان فى مشاكل تانيه بتشغلنى عنها وعن حلها دلوقتى

بقى كل المشاكل ظهرت مره واحده

ومفيش ولا مشكله واحده عايزه تتحل كلهم ناويين يخلصوا

على شويه الصبر اللى فيا



المشكله ان دلوقتى غير من 4 سنين المسئوليه اكبر والحمل اكتر

والهم للاسف اكتر مش عارفه احل مشكلتى دى ازاى ...

دورت على حلول ليها كتير بس للاسف منفعش

اظاهر ان حلها مش بايدى وان ربنا هيحلها من عنده ...

الله المستعان

المشكله انى تفكيرى مش معايا ودماغى غايبه خالص

مش عارفه اطنش المشكله دى ولا اشيلها من دماغى

مش عارفه ولا اذاكر ولا افكر فى اى حاجة غيرها



انا عمرى ما كنت كدا ابدا كنت بحب المذاكره جدا

والحمد لله تقديراتى كانت كويسه بس ياخوفى ليحصل

السنه دى زى اللى حصل فى 3 ثانوى بس انى انزل

فى الكليه ليها معنى تانى خالص وخاصا انى مش بذاكر

خالص وعندى وقت كتير بس برضوا


مش بذاكر ومنزلتش الجامعه النهارده بردوا بسبب المشكله دى

ومبقتش مركزه ولا عارفه اظبط وقتى واذاكر حاجة عندى حاله

احباط ربنا ما يعيشها لحد يا ساتر على الكآبه D:

فعلا شر البليه ما يضحك وفعلا لازم اعمل الابتسامه دى دلوقتى

علشان مكتآبش اكتر


بدى نفسى أمــــــــــــــــــــــــــــــــــــــــــــــــــــــــل

أمل حياتى على رأى ام كلثووووووووووووووووم

أقول نكته طيب .......................................



شويه كلام زى البلوج اللى فات

فاكره انى كنت بكتب مواضيع باسم شويه

كلام كنت لسه بقراهم امبارح وافتكرت الاسم

دا دلوقتى

طيب بقى

شويه كلام

استحملنى يا بلوجى

وهريحك منى قريب