OLiVeTrEe

welcome to my Blog

أسئله + تحديث بإجاباتى


السلام عليكم ورحمه الله وبركاته


فى حاجة اسمها اخوه بين ولد وبنت؟؟؟

فى حاجة اسمها صداقه ما بين ولد وبنت؟؟

فى حاجة اسمها صحوبه ما بين ولد وبنت ؟؟؟

فى حاجة اسمها غيره بنت على ولد؟؟؟

فى حاجة اسمها غيره ولد على بنت؟؟

فى حاجة اسمها حب فى صمت؟؟

فى حاجة اسمها حب مرضى؟؟؟



<<<<<<<<>>>>>>>


فى حاجة اسمها اخوه بين ولد وبنت؟؟؟

اه فى اخوه ما بين ولد وبنت اخوه فى الله بعيدا عن اى شهوه او غريزه فينا كبشر
اخوه فى التعامل سواء بقى فى الشغل او الدراسه او حتى المواصلات

فالبنت اللى ممكن تركب جنبك دى اختك فى الدين

لحد ما تنتهى المسافه مش انك تفتح معاها كلام
اخوه ما بين ولد وبنت بتكون محسوبه مش

ان كل واحد او واحده يقول دا اخويا
او دى اختى ويسوقوا فيها بقى , باماره ايه ؟؟؟


فى حاجة اسمها صداقه ما بين ولد وبنت؟؟

كلمه صداقه منشقه من الصدق فى الحديث والتعامل والاسلوب

ودا بتعنى المناقشات
والتفاعل والحوارات اللى ممكن تحصل ما بين الولد والبنت
طيب دى حاجة موجوه؟؟
لا مش موجوده لان دينا بيرفض دا نهائى
دينا بيرفض ان الولد يبقى له صديقه بنت او العكس
لان احنا بشر ومحدش بيقدر يتحكم فى غريزته

او مشاعره الا ما رحم ربى
ودا موضع فتنه والافضل البعد عنه نهائيا نهائيا

فى حاجة اسمها صحوبه ما بين ولد وبنت ؟؟؟

الصحبه ما بين ولد وبنت
دى المرحله التاليه للصداقه مرحله الانتقال من الكلام والحوارات
الى الخروج والصحبه فى كل مكان وزمان ووقت
ودا مبدا مرفوض تمام في دينا
ومن غير ما اطول يكيفنى انى اذكر قول الله عزوجل
أعوذ بالله من الشيطان الرجيم
(ولا متخذات أخدان )
صدق الله العظيم
يعنى دا امر من الله للمسلمات بعدم اتخاذ اى صاحب لها
سواء فى دراستها او اى مكان كان

فى حاجة اسمها غيره بنت على ولد؟؟؟

الغيره بتكون على المحبوب
يعنى لازم يكون حبيبها علشان تغير عليه
طيب يعنى ايه حبيب
الحبيب هو الشخص الذى تتجه اليه كل مشاعرنا واحاسيسنا
طيب وهل دى حاجة صح
غالبا بتكون مش صح
وغالبا ما بيكون شىء بنخفيه جوانا منعا من الاحراج
يعنى بنسررق من غير ما حد يشوفنا
الا فى حاله الارتباط الرسمى ويكون معترف بيه
...

وممكن ان يحصل غيره من بنت على ولد بدون احساسها ليه كحبيب
بس بتغير عليه حبا لشخصيته وخوفا عليه من اى شىء ضار ممكن يحصل ليه
علشان كدا بتغير عليه فى احوال كتير


فى حاجة اسمها غيره ولد على بنت؟؟

أممممممممممممم
اه لما بتكون زوجته او خطيبته
فى حاله اننا هنلغى كلمه محبوبه الا ان يتم ارتباط رسمى ما بينهم
وكمان فى غيره الولد على بنت بدون ان تكون حببته يعنى فى بعض المواقف
اللى بتحصل وبدون اى علاقه ما بين الولد والبنت دى

وبتلاقى الولد ممكن يدافع عن البنت
فيها بسبب غيرته عليها كاخت ليه مثلا مش حبا فيها يعنى
يعنى مثلا لو واحد شاف واحده بتتعاكس من شخصيه مش كويسه
ممكن يتخانق مع الشخص دا مش حبا فيها بس بتتسمى رجوله وشهامه


فى حاجة اسمها حب فى صمت؟؟

اه موجود بس سرعان ما يتلاش وينتهى
لان الاحساس بالحب اتجاه شخص لو ملقاش رد فعل
من الشخص الاخر بيتلاشى وبيموت بمرور الوقت
بعد جرح صاحبه لفتره لحد ما ينتهى الاحساس دا


فى حاجة اسمها حب مرضى؟؟؟

ايوه موجود
الحب المرضى هو الحب الشديد اتجاه شخص

وممكن الشخص دا ميكونش حاسس بيه
بس بيكون حب مرضى وغيره قاتله وممكن توصل الى الجنون
بمعنى اصح حب بدون اى تعقل فيه او ادراك للحقيقه فيه

طيب ودى حاجة مطلوبه ؟؟
لا مش مطلوبه لان الحب بيحتاج الى تدخل العقل لتدبر بعض الامور

بالتفكير وليس بالتهور فى بعض الامور

الحب بيكتفى بالصدق والامان
والثقه والاحتواء المناسب للنمو
بس الحب ما بين شخصين مرتبطين سواء زواجا او ارتباط رسمى,

انا مش بلغى ارتباط المشاعر بس لازم فى اسرع وقت ممكن تتثبت

بشىء رسمى لان اللى بيحب حد بيخاف عليه من اى غلط
وفكره الارتباط لفترات بدون شىء رسمى فكره غلط للطرفين


دى ردودى انا على الموضوع مقتنعه جدا بكل لفظ كتبته
وبوجه نظرى دون اى استثناءات لاى موقف او حدث
....
انا انتظرت شويه على ما اشوف الردود وبعدين انزل رايى
:)



دمتم فى حياه سعيده ابديه ان شاء الله


سلامى

13 تعليقات اجمد ناس:

!! a7mad sala7 !! يقول...

انا ارى ان كلهم موجودين
ما عدا

الصداقة والصحوبية

الصداقة مرحلة من الصحوبية
والاتنين دول مبيتكونوش الا بين شخصين من جنس واحد

مفيش ولد وبنت صحاب
صحاب يعنى حياتهم مع بعض
رايحين جايين اكلين شاربين
واحيانا نايمين
مع بعض

اسرارهم مع بعض حياتهم معظمها مع بعض
حاجات كتير مينفعش تتوفر الا بين شخصين بنفس الجنس

صداقة بين ولد وبنت دى كلمة بنضحك بيها على نفسنا

هى ممكن تكون زمالة دراسة
او جيرة او معرفة نت
بس كلهم فى اطار الاخوة يعنى بمعناها الروحى



بس نفسي اعرف ايه الغرض من البوست ده :D

AhMeD DeEb يقول...

السلام عليكم

تقريبا كنت هأقول نفس كلامك يا ابو حميد

وأنا برضه رأيي من رأييك
مفيش صحوبية بين ولد وبنت اطلاقا
ع الاقل في مجتمعنا الشرقي

أما موضوع أصدقاء
فده موجود دايما

لكن أكيد الاخوة موجودة
والغيرة موجودة حتى لو مش بيحبوا بعض الحب الرومانسي
ممكن يغير عليها كأخته

وبرضه نفس السؤاااااال

ليه ؟؟ البوست ده ليه ؟؟؟.؟؟


والسلام ختام

halaS demahoM يقول...

ولاني بحب المحايده ومبحبش اجي علي حد
هقول
اللي شايف انه في الحاجات دي كلها يبقي في
واللي شايف انه مفيش الحاجات دي كلها يبقي مفيش
لا اجابتنا هتفرق معاه من هنا لحد هناك

OlivE يقول...

!! a7mad sala7 !!
&
AhMeD DeEb

تقريبا ارائكم واحده تقريبا
وانا متفقه معاكم فى آرائكم

//
هى ممكن تكون زمالة دراسة
او جيرة او معرفة نت
بس كلهم فى اطار الاخوة يعنى بمعناها الروحى//
أه مرحله وتعدى تقصد

//
ع الاقل في مجتمعنا الشرقي
//
حضرتك تقصد فى دينا بعيدا عن اننا شرقيين او غربيين


//
لكن أكيد الاخوة موجودة
والغيرة موجودة حتى لو مش بيحبوا بعض الحب الرومانسي
ممكن يغير عليها كأخته
//
رأيى من رايك فى الحته دى وممكن هى كمان تغير عليه كاخوها فقط بس بدون اى تلميح او شىء علشان مش تتفهم غلط :)


شكرا للاهتمام والرد على الاسئله

والسبب للبوست دا
حاجة بسيطه جدا
نوع من انواع المناقشه ومعرفه آراء الناس ليس أكثر لو مكنش حد عنده مانع فى البوست او الاسئله طبعا

نورتونى ودمتم فى سعاده
:)

OlivE يقول...

juegth night
//
ولاني بحب المحايده ومبحبش اجي علي حد
//

مع احترامى الشديد لحضرتك
الموضوع دا مينفعش فيه اى محايده ولا انك هتيجى على حد دا مجرد اراء عاديه كل واحد ووجه نظره وتفكيره وأظن أنه موضوع مهم جدا فى رأيى بسببه بتظهر مشاكل كتير يمكن لو فكرنا فيه احنا فى غنا عنها

//
هقول
اللي شايف انه في الحاجات دي كلها يبقي في
واللي شايف انه مفيش الحاجات دي كلها يبقي مفيش
//
اه اللى بيحب البيتزا يجى الناحيه دى واللى بيحب الكشرى يجى الناحيه دى
بس حضرتك انا مش برتب طابور علشان الزحمه انا بقصد الرأى الخاص لاى حد حابب انه يعلق او يكتب رايه

لو مشينا على كدا يبقى الكل هيروح للبيتزا علشان بس عقده الخواجه :)

//
لا اجابتنا هتفرق معاه من هنا لحد هناك
//
مين قال يا فندم انى الاجابات مش هتفرق؟؟!!!
ولو مش فرقت مش مهم كل واحد بيقول رايه بمنتهى الحريه دا لو حد عايز يرد وعنده وقت للرد

تقبل ردى على كلامك

نورت
دمتم فى سعاده

سلامى

with you يقول...

السلام عليكم ورحمة الله وبركاته

تحياتي لحضرتك ولفكرك

أما عن الإسئلة فلي سؤال:

هل الأسئلة تطلبي في إجابتها الإجابة الصحيحة أم المفروض أن تكون ؟

بمعني هل أنتِ تتحدثين عن واقع أم قواعد؟

أتمني أن تجيبيني لأن الإجابة مهمة عندي.

تحياتي

محمد حياتنا

OlivE يقول...

with you

وعليكم السلام ورحمه الله وبركاته
//
تحياتي لحضرتك ولفكرك
//
أشكرك

//
بمعني هل أنتِ تتحدثين عن واقع أم قواعد؟
//
أنا أقصد من أسئلتى نوع من انواع المناقشه بمعنى اصح الوصول للقواعد اللى مفروض تتطبق فى الواقع وآراء الناس بتبين الواقع وصل لفين بالظبط فبالتالى هنعرف هل القواعد مازالت موجوده ولا تلاشت .

يعنى لو فرضت ان الناس اللى ممكن ترد هنا زيى فى سنى مثلا عايزه اشوف ارائهم وتفكيرهم ازاى وخاصا فى السن دا والوقت دا بالتحديد...
بس

حضرتك شرفت المدونه
:)
سلامى

OlivE يقول...

كلمتين بس...

ردى على الاسئله بعد تفكير عميق ما بين الواقع واللى مفروض يكون

محبتش انافق نفسى فى ردى ولازم كان ردى يكون زى اللى فى واقعى
لان الرد مش سهل وانا مبحبش انافق نفسى او الناس من حواليا
ممكن اكون غامضه بس اسلوبى سهل فهمه ومعرفته ايه اللى وراه

وبدعى ربنا يثبتنى على رايى بدون اى تغييرات فيه

وربنا يهدينا جميعا

with you يقول...

السلام عليكم ورحمة الله وبركاته

إذا الإجابة كما كتبتِ أنتِ

أما لو تتحدثين عن الواقع فكل الإجابات
تكون إجاباتها بكلمة نعم

تحياتي لفهم حضرتك

أتمني دوام التواصل

بارك الله فيكِ تحياتي

محمد حياتنا

OlivE يقول...

with you

//
أما لو تتحدثين عن الواقع فكل الإجابات
تكون إجاباتها بكلمة نعم
//
السيئه بتعم والحسنه بتخص
لو فعلا هنتكلم عن الواقع بصفه عامه مش بقصد مثال معين او حد معين
يبقى دا كله موجود بدون استثناء حاجة


أشكرك

سلامى

أنشودة يقول...

متفقه معاكى جداااااااا
مفيش صداقه ومفيش صحوبيه
بس فى زمالة سواء عمل او دراسه وفيه اخوه بس ليها حدود لو اتعدت ببساطه ممكن تتحول لحاجه تانيه

جزاكم الله خيرا

OlivE يقول...

انشودة
//
بس فى زمالة سواء عمل او دراسه وفيه اخوه بس ليها حدود لو اتعدت ببساطه ممكن تتحول لحاجه تانيه
//
فعلا دا اللى عايزه اقوله بالظبط

//
جزاكم الله خيرا
//
وجزاكى ان شاء الله

نورتى فى اول تعليق ليكى

سلامى

halaS demahoM يقول...

اسف عــ التدخل السخيف ده
بس حضرتك بتحاولي تثبتي ايه ولمين؟؟؟

لان الكلام -سوري يعني- لا هيقدم ولا هياخر
واللي مقتنع بحاجه هيعملها
ومهما قولنا وعيدنا مش هيغير نفسه
سواء كان كده او العكس
وكون ده وجهة نظرك فعل راسنا من فوق

وكونك بتشوفي اراء الناس
فمش عارف بقي