OLiVeTrEe

welcome to my Blog

كلنا عشاقه + مكس من شويه فضفضه



السلام عليكم

أزيكم... أزيكن

البوست طويل

يعنى اللى مش حابب يقراه اوك علشان اوفر عليكوا وقتكوا :(


يمكن الحكايه اللى عايزه اتكلم فيها كنت حابه اتكلم فيها من 3 اسابيع بس حصل ظروف ومتكلمتش فيها
والمفروض اتكلم فيها بعد 10 ايام بس غالبا مش هينفع وقتها أتكلم فيها يعنى شويه ظروف كدا هتحصل
ما علينا

القمـــــــــــــــــــــــــــــــــــــــــــــــــر
طبعا مفيش حد مبيحبش يشوف القمر ولا يسرح فيه وفى ضوءه
انا بقى واحده من الناس اللى بتعشق ضوء القمر وبعشق انى انظر ليه حتى وهو لسه ربيع أول :)

يمكن أول مره الاحظ القمر اوى وادقق فيه جدا وألاحظ الشكل اللى بيتكون عليه لما يكون مكتمل
كنت بعد 3 ثانوى بعد فتره الامتحان وفتره سنتين مخرجتش بره البلد كان لازم اسافر
وفعلا كنت مسافره فى طور سينا
بالظبط المشهد كالاتى:
واقفه فى البلكونه بعد المغرب بشويه على يمينى القمر مكتمل بدر فى ليله تمامه
ومن شده ضوءه كان منعكس على الجبال
وكان قدامى بالظبط صف التانى من الشارع ووراه على طول قمه الجبال وضوء القمر منعكس عليها
من أكتر المناظر اللى مقدرش انساها فى عمرى
ووقتها لما دققت فى القمر اوى شوفت وجه بنوته صغيره لسه فى عمر 15سنه مبتسمه
وابتسامتها رقيقه جدا تكاد اراها فى الواقع
أتمنيت ساعتها أنى لو معايا موبيل كنت صورتها

بس لما رجعت البلد وبعد شهر تقريبا اتكرر قدامى المنظر بس المره دى
كان وجه فتاه فى الثلاثين من عمرها
استغربت جدا ازاى الملامح اتغيرت وازاى اتحولت

ساعتها سألت ناس كتير انتو بتشوفو وجه القمر ازاى ناس قالو انهم بيشوفوه وجه أمرآه
وناس قالو عادى ولا بنلاحظ
وناس قالو دى مجرد صخور ملهاش اى شكل معين
ويمكن أتكلمت مع ناس فى موضوع ان شكل الصخور اتغير
وظهر مره فتاه فى 15 من عمرها ومره فى30 من عمرها
معظم الردود ان انا نظرتى اللى اتغيرت مش هى

بس لحد النهارده وانا نظرتى متغيرتش
هو وجه الفتاه فى الثلاثين من عمرها ومتغيرش
بس يمكن اللى بيتغير ملامح الوجه مره حزينه ومره سعيده
وبحاول ادقق جدا جدا علشان اوصل للملامح
ولأن نظرى ضعف جدا بسبب الكمبيوتر طبعا الملامح بدأتت تتلاشى من ذهنى

يمكن اللى بيخلينى مرتبطه اوى بالقمر
هو انى لما بكون مخنوقه او فى حاجة مضيقانى اخد نفسى واطلع فوق خالص فى بيتنا
وأقف اتفرج على منظر الناس فى الشارع
وبيصدف ان القمر بيكون موجود فى طور من اطواره مش شرط يكون بدر ومن هنا ظهر عشقى لضوءه
يمكن كتير بيخفف من زعلى لو زعلانه وبينسينى اى حاجة مضيقانى وبيدخل فى قلبى الفرحه بملامحه

يمكن من شويه لما شوفته واحنا لسه النهارده ليله 4 بس حسيت انى شيفاه مكتمل قدامى
شايفه الجزء المضىء منه وشاغل بالى الجزء المعتم منه لان ساعتها بيفكرنى كتير بحالى

يمكن الناس تستغرب انى دايما بحب اشوف الجزء المعتم
بس دا العكس يمكن لانى بحب الامور تكون واضحه قدامى جدا
علشان متصدمش بأى موقف مش كان على بالى ودا بيخلينى دايما مشغول بالى بالمستقبل
بس النهارده عمال يجى على بالى جمله واحده ( لو علمتم الغيب لاخترتم الواقع)
فعـــــــــــــــــــــــلا كتير لما بنشغل تفكيرنا بالمستقبل ومش بيتحقق زى ما احنا شيفينه
بنحزن جدا وبشوف ناس كتير كدا

يمكن انا مش كدا اوى لانى ببساطه حلمت احلام كتير جدا لا تعد ولا تحصى
ومتحقشش منهم اى حاجة لحد دلوقتى على الاقل فى الوقت اللى كنت متوقعه فيه حدوثه
بس مزعلتش ولا اضيقت بالعكس زاد يقينى فى الله وان الله عزوجل كاتب ليا حاجات
افضل ان شاء الله واكيد التقصير فيا انا وان الاحلام دى مش من حقى حاليا
لانى متعتبتش علشان تتحقق ليا


بمناسبه الجزء المفرح والجزء المحزن فى اى شىء
انا فاكره ان يوم النتيجه قولت انى مش فرحانه او مش دى الفرحه اللى تستحق النجاح
يمكن مبينتش السبب
لان السبب ببساطه انى كنت اتمنى وجود ناس جنبى فى اللحظه دى هى اول ما تقولى مبروك
أتمنيت والدى يكون معايا ويشوف بنته وهى فى آخر سنه وكلها كام شهر وتتخرج
كان نفسى اخواتى يكونوا موجودين ويكونوا اول ناس تعرف بس للاسف
كان نفسى صحابى يفرحوا معايا واحس منهم بسعادتهم دا بس بردوا للاسف
كان نفسى بجد ساعتها احس بفرحه ناس كتير معايا كانت حاجة هتدينى تحفيز عالى جدا ليا
بس دا محصلش يمكن هو دا الجزء المعتم اللى يحزن
بس فى نفس الوقت ميخلنيش استسلم ولا اقول الحمد لله وابقى سعيده بكرم ربنا عليا


اكتر جزء معتم دلوقتى فى حياتى هو القلق اللى بشوفه فى وجوه ناس كتير
او بمعنى اصح الاسرار اللى بحس انها مرسومه على وجههم وحساها
بس هما فاكرين ان محدش شيفها
اكتر حاجة تعبانى لعبه ناس كتير بتلعبها من حواليا نظام الدايره
والكلام يلف الدايره على ألسنه ناس مختلفه
طيب ما يتقال مره واحده وخلاص لازم يلف ويتحور
وبردوا هيلف فى الدايره كامله وهيتعرف هيتعرف

واكتر جزء كمان هو الناس اللى بتغير معاملتها معايا فجأه كدا من غير اى مبررات
او مبررات انا فهماها بس مسمعتهاش مباشره ليا كانت هتوفر كتير من الزعل اللى ممكن يحصل

ياريت لو فى حد زعلان منى او مضايق هو مغير معاملته او معاملتها وفى اسباب ياريت اعرفها
بدل ما ازعل واشيل جوايا من غير سبب مقنع

وممكن اكون انا اللى مكبراها وباخد كل حاجة بشكل شخصى شويه ... فى الاخر الله اعلم
بس انا حاسه بالتغيير جامد جدا من ناس كتير
وممكن يكون السبب حاجة تانيه خالص وهى
انى لما بتعود على معامله معينه من اى حد صعب جدا اتقبل غيرها
الا بعد مرور فتره كبيره واسباب مقنعه للتغير
لو مفيش بزعل وبضايق وبشيل من الشخصيه دى لابعد الحدود


اتكلمت كتير انا عارفه :)
بس لانى غالبا هغيب شويه عنكم الله اعلم بالظروف
بس اللى واضح انى هغيب شويه عنكم
حبيت اطلع كل الكلام اللى جوايا مره واحده

سلامى
دمتم بخير


5 تعليقات اجمد ناس:

morgana يقول...

لقيتك بتتكلمي عن القمر قولت لازمن اقرا
اصله بيقلدني :D
:-P :-P :-P :-P :-P

/بس اللى واضح انى هغيب شويه عنكم /
طااااااااايب
غيبي شوية وتعالي بسرعه

/حبيت اطلع كل الكلام اللى جوايا مره واحده/
طلعي يا حبيبتي
متخليش في نفسويتك حاجه

AhMeD DeEb يقول...


اولا ازيك
ثانيا أنا برضو هأتلكم كتير
أول حاجة بالنسبة لموضوع القمر والملامح اللي بنشوفها فيه
أنا في رأيي القمر ده زي المرايا
بيعكس الحاجة اللي جوانا
انا عن نفسي ساعات بشوف فيه صورة موج بحر أو ملامح رجل عجوز وساعات بشوفه خالي جدا من أي تعابير وأحسه فعلا جامد ومجوف من جوة
وساعات بحس ان هدوءه الظاهري ده بيعكس تقلبات كتير جواه
وده فعلا بيكون مرايا للي جوايا
..
نسيبنا من القمر بقى

أحب أقول بس إن كل الفضفضة اللي اتقالت بعد كده أنا حاسس كأنها طالعة من جوايا أنا
اه بكره برضو ان الناس تغير تعاملها معايا فجأة من غير أي مقدمات
بكره ان حد يزعل مني من غير مايعاتبني
ممكن لأني في حياتي ما زعلت من حد وجيت أصالحه الا لما أعاتبه الأول
في ناس كتير قالتلي ان أنا كده بحب أقلب في القديم وأفتح في حاجات ملهاش لازمة
مادام اتصالحنا يبقى خلاص
لاء
ازاي أرجع أصالح حد وأنا شايل جوايا منه أو هو اشيل جواه مني من غير ما نطلع ونصفي القلوب سوا
لما نرجع ونقول اسف وتقبلت أسفك وشكرا على كده
ده كده بنضحك على بعض
وبنقابل بعض بوش ومن جوة وش تاني
زي اللي لابس قناع بيخفي بيه مشاعره وانفعلاته الحقيقية

بالنسبة برضو لأني أغير معاملتي مع حد
فعلا مبعرفش
أنا باعامل شخص بطريقة معينة
مينفعش بعد كده أنزل أو تقل المعاملة
هي ممكن تتطور اه لكن تقل وتخف
ما أعتقدش
قلتها أحسن ولو اني مبحبش أبدا أعرف حد
وبعد كده ... ما أعرفوش
مبحبش كده
بس هيكون أهون عندي من لبس القناع ...

أرجو إني مكنش طولت ع الفاضي

وياريت الغيبة ماتطولش
وتيجي بالسلامة

والسلام ختام

OlivE يقول...

morgana

//
اصله بيقلدني :D
:-P :-P :-P :-P :-P
//
ال بيقلدك ال

//
طااااااااايب
غيبي شوية وتعالي بسرعه
//
حاضر يا ماما مورجن
وحشنى البلوووووووووج موت :((


//
طلعي يا حبيبتي
متخليش في نفسويتك حاجه
//
واخلى ليه
لو مكنش بلوجى اللى يسمعنى و اتكلم فيه
ليا حد تانى !!


نورتى يا مورجانه

OlivE يقول...

AhMeD DeED

//
اولا ازيك
//
اولا الله يسلمك :)

//
ثانيا أنا برضو هأتلكم كتير
//
ثانيا البلوج بلوجك تنور

//
انا عن نفسي ساعات بشوف فيه صورة موج بحر أو ملامح رجل عجوز وساعات بشوفه خالي جدا من أي تعابير وأحسه فعلا جامد ومجوف من جوه
//
مممممممممممم
انا دايما اشوفه فى صوره بنت
او شكل مش واضح خالص

//
أحب أقول بس إن كل الفضفضة اللي اتقالت بعد كده أنا حاسس كأنها طالعة من جوايا أنا
//
:)
بتحصل بيبقى توارد افكار وتخيل كمان


//
بكره ان حد يزعل مني من غير مايعاتبني
ممكن لأني في حياتي ما زعلت من حد وجيت أصالحه الا لما أعاتبه الأول
//
فعلا انا بشوف ان العتاب هو اساس حل اى مشكله وانها حاجة بتصفى النفوس


//
في ناس كتير قالتلي ان أنا كده بحب أقلب في القديم وأفتح في حاجات ملهاش لازمة
//
فعلا دا اللى بيتقال
بس ايه لازمتها الصلح واحنا من جوانا لسه فاكرين الوحش جوانا !!!

//
وبنقابل بعض بوش ومن جوة وش تاني
زي اللي لابس قناع بيخفي بيه مشاعره وانفعلاته الحقيقية
//
تمااااااااااااااام
انا معاك فى دا جدا


//
أرجو إني مكنش طولت ع الفاضي
//
لا خالص
البلوج بلوجك


//
وياريت الغيبة ماتطولش
وتيجي بالسلامة
//
مش طالت اولا يعنى 10 ايام :)



كل سنه وانت طيب
سبقتنى بكام يوم :)
هروح اقولها فى بلوجك حالا D:

سلامى

OlivE يقول...

صحيــــــــــــــــــــــــــــــح

نسيت اقول انا اسفه جدا على التأخير فى الرد
بس فعلا كان نفسى ابعد شويه
مش عارفه ليه