السلام عليكم ورحمه الله وبركاته
وحشتونى والله
ووحشنى الرغى هنا بس
اييييييييييييه دنيا بقى
يمكن اكتر حاجة شغله تفكير معظم الناس دلوقتى
اللى حصل قبل وبعد واثناء مباراه مصر والجزائر
اولا كدا انا مليش فى الكوره بس اهلاويه تقولولى ازاى
اقول ليكم هو كدا وخلاص اهلاويه وبحب الاهلى جدا
مفيش حد تقريبا فى مصر متفرجش على الماتش
بس من وجه نظرى ان اللعيبه بتوع الجزائر مكنوش
نازلين يلعبوا كوره دول نازلين يضربوا ويقلوا ادبهم
وكان هاين على كل واحد فيهم يمسك كل لعيب
يضربه مش يلعب قصاده فى ماتش محترم
كان اسلوب نرفزه ولعب مش مريح
وضغط اعصاب فظيع انا كنت شيفاه
ويمكن دا اللى كان تعبنى
واللعيبه المصريين يعنى اكيد يعنى
دا لازم ياثر عليهم فى اللعب وفى الاداء كمان
ماعلينا من كل الكلام دا انا مش ناقده رياضيه
:)
بس اللى خلانى اتابع الاحداث هى اهتمام الناس
وان الناس كانت عايزه تفرح وبس
بجد والله الناس كانت نفسها تفرح الفرحه دى
ولكن حصل ما فى الحسبان ولا حتى فى تخيل اى حد
يمكن كنت بتفرج وانا فعلا مستنيه فرحه
فرحه هشوفها بكره وانا رايحه الكليه على
وجه كل حد هقبله كل الناس كانت بتمنى دا
بس الحمد لله على كل حال والحمد لله اننا خسرنا
انا بعد الماتش بكلم اخويا على الموبيل بقوله
احنا شعب لو فرح اكتر من 3 ايام يبقى غلط عليه
:(
بس ايه بقى اللى حصل دا انا مش عارفه
ومحدش يقول انه عارف
فى ايه
يعنى ايه الجزائرين يشتروا كل الاسلحه البيضاء من السودان
من قبل المباراه ويعنى ايه يحصل ترهيب للسودانيين هناك
لا والموضوع وسع عن كدا كمان
يعنى ايه ان جزائريين يسافروا فى طائره عسكريه من
الجزائر للسودان وياريت تكون ناس ذات سمعه او مهمين فى الدوله
لا دول مخرجينهم من السجون وبعتين ناس استغفر الله شكلهم اتم بجد
والله انا الكاميرا لما كانت بتيجى على وشهم كنت بتنرفز من نظراتهم
؟؟؟؟؟؟؟
طيب يعنى ايه يكسروا ويدغدغوا شركه سويرس هناك
ويخسروه 5 مليار او اكتر
سيبكوا من سويرس كشخصيه بس اشمعنا دا علشان مصرى
علشان ماتش كوره مظنش والله؟؟؟
طيب يعنى ايه يبهدلوا الطيران المصرى هناك وكل حاجة
الناس دى كرهنا ليه بس انا مش عارفه
المشكله انهم فى حاله برود تام ومحدش سامع ليهم صوت ولا حد
اتكلم عندهم
ولما الرئيس يبعت يجيب السفير من هناك للتناقش لا الموضوع كبير
اكبر مننا ومش عارفين حاجة
ويطلع ابن الريس يتكلم وهو متنرفز وهاين عليه يشتم فيهم
بس ماسك نفسه يبقى الموضوع وصل كمان للحزب الوطنى
بقى والدليل على كدا نرفزته وكلامه اللى من تحت لتحت دا
طيب يوصل الحال ليه انهم يولعوا فى العلم
ويحطوه على الارض ويمشوا العربيه عليه
ايه هى مصر فى نظرهم بقت اسرائيل
بقينا زى اسرائيل يعنى خلاص بقينا صهاينه
واخر حاجة سمعتها انهم بيفتحوا موضوع معبر رفح
واننا قفلناه فى وش الفلسطنيين ؟؟؟!!!
محدش يقولى ايه جاب دا لدا
ما خلاص احنا صهاينه فى نظرهم ومبيتين لينا كل دا من زمان
وبجد احنا اعلنا اننا ناس اضعف ما نكون
ومبنعرفش ناخد حقنا فى اى حاجة
يعنى ايه يسفروا المصريين جرى من السوادن خايفين عليهم
من غير ما يتعمل اى محضر للى حصل هناك ويعملوا محاضر اثبات حاله
طيب خدوا على ماغكم بقى ولا حد هيعبركم ولا يدور على حقوقكم
واللى ينرفز ويتعب ان فى ناس فى مصر كانوا على علم بان هيحصل كدا
ومحدش سمع ليهم صوت ولا نفس وفى الاخر مصريين
والله انا ما عارفه اقول ايه
اخر حاجة الصوره دى شوفتها على النت النهارده
ومعنديش تعليق عليها
هما يولعوا فى عملنا واحنا نولع فى علمهم وفى الاخر
محدش فاهم حاجة من اللى حصل
سياسه فى كوره فى حرب ما بين البلدين داخليه
حسبى الله ونعم الوكيل
خلاص بقى انسوا وكل سنه وانتم طيبين
العيد كمان 5 ايام صوموا وادعوا وقولوا يارب
وادعولى معاكم وكل عيد انتم طيبين
انسوا الزعل وربنا موجود
ولان الناس زهقت من الكلام فى الموضوع دا هقفل التعليقات
انتم علقتوا بما فيه الكفايه فى كل المدونات
بس كلمتين كانوا وقفين بقى ولازم يتقالوا بدل ما روحى تطلع
وعلى فكره انا متكلمتش مع حد فى الموضوع دا
قولت اطلع كل المخزون هنا وخلاص
سلامى
