شويه من المخزون :)

السلام عليكم

:)

شويه فضفضة بقى

انا بقيت عمه
الحمد لله اخويا ربنا رزقه ببنوته عسوله
اخيرا هيبقى فى بيتنا بنوته صغيره تقولى يا عمتو , يا عمتو
ربنا يخليهاله يارب ويبارك ليه فيها
هو لسه مستقروش على الاسم
بس ما بين 3 اسامى فيهم اسمين عجبنى واحد فيهم بموت فيه
والتانى حلو اوى لانه جديد واول مره اسمعه صراحا
بس احساس حلو اوى لما تشوف بيبى عمره ساعات سبحان الله :)

بيقولوا شبهى انا وعمرو :))
بس طبعا دا كلام لان الاطفال مش بيثبتوا على شكل معين
ملامحهم بتتغير مليون مره
++++++++++++++

روحت يوم الاحد قدمت فى الاى تى اى
وبعد ما فكرت قولت لا مش هكمل
بصراحة الموضوع بالنسبه ليا انتحار
يعنى تقريبا 6 ساعات سفر يوميا وغير شغل 8 ساعات هناك
وموضوع الاقامه فى المنصوره شىء شبه مستحيل ومرفوض نهائى
وبصراحة لما فكرت قولت الموضوع مش سهل اوى وان كانت تجربه حلوه
بس بردوا مينفعش
المفروض امتحانى الصبح الساعه 10 بس انا صرفت نظر خلاص
ورغم عشقى للمنصوره بس بردوا كل شخص وظروفه بقى
وانا استفتيت قلبى وقولت لا وانا مقتنعه وربنا يوفق صحابى اللى قدمو
وان شاء الله يتقبلوا ويبقوا احلى مهندسى برمجه :)

+++++++++++++++++++++++++++++++++

شويه مشاكل كتير ظاهره كدا وتعبانى صراحا جدا
ومش قادره افكر بسببها
بقيت دايما حاسه بحاله عدم مبالاه سواء للفرح او الحزن
بجد ولا بقيت عارفه افرح ولا حتى افرق ما بين الفرح والحزن
بقيت احس ان كله بقى سواء عندى

انا مش مبسوطه من حاجات كتير
ومش مبسوطه من نفسى قبل اى حاجة تانيه
ومخنوقة من المشاكل اللى عمرها ما هتخلص دى
واناعارفه انها مش هتخلص وبقت واقع بس الناس هى اللى بتخلينى افكر فيها

++++++++++++++++++++++++

ليه بقى مفيش حد بيحب يطلع نفسه غلطان وانه الصح على طول الخط
بحس ان الناس دى مغروره اوى وبجد بتخنق منهم
دا من قال لا اعلم فقد افتى
مش لازم يعنى نبين اننا ملمين بكل حاجة والدنيا بالنسبه لينا اوضه وصاله
واحنا لفينها مليون مره
حاجة غبيه اوى لما واحد يعيش نفسه دور الشيخ وهو بيشرب سجاير ومقضيها بقى
والاغبى ان واحد يكون كويس ويبين نفسه فى ابشع صوره
هو للدرجة الناس مش قادره تقدر نفسها
ولا الكويس عارف يقدر نفسه واللى مش كويس عارف يلم نفسه :(

++++++++++++++++++++++++

بقالى كام يوم بفكر فى موضوع واحد وبس
ومش عارفه اخرج نفسى من التفكير فيه
وكتير حاولت معرفتش لدرجه انى كنت بكتئب كل ما بفكر فى الموضوع دا
مش عارفه اعمل ايه كل ما اقول لا خلاص ومش هفكر تانى واحاول اشغل نفسى
فى اى حاجة بس مش عارفه الدايره بتلف وارجع تانى افكر فيه
:((
يمكن لانى نفسى احكى فيه بصوت عالى بس هحكى ازاى يعنى
انا بحس ان بقيت مستمتعه جدا انى كدا محدش حاسس باللى نفسى اقوله
وبصراحة كل محاولاتى ان اقرب حد منى قوى من صحابى ارجع اندم تانى
معرفش دا قله ثقه ولا لان مفيش صحوبيه زى اللى فى خيالى وبحلم بيها
او ممكن يكون هى دى ظروفى وقدرى وشكلى كدا والله اعلم هتفضل معايا طول عمرى

+++++++++++++++++++++++++++

صحيح
ناس كتير بتقولى انى غامضه
ليه ميكونش هما اللى مش شاطرين ولا بيقدروا يحسوا باللى نفسى اقوله
رغم ان كلامى بيفضح احساسى جدا
هو غالبا فى حاجة فى الاتموسفير مبوظه الدنيا شويه فى نظرى

هرش وارجع يمكن الحال يتعدل


سلامى

مش عارفه سبب الاختلاف !!!

السلام عليكم ورحمه الله وبركاته

:(

اسفه مش هقدر انزل الحلقات زى ما كنت اتمنى

على العموم هى كانت حلقات او فلاشات للشيخ أبى اسحاق الحوينى

باسم عطر الكلام

بس للاسف النت عندى مش كويس الفتره دى

انه يرفع كل يوم حلقة مدتها ربع ساعة


++++++++++++++++++++++++++++++

هو رمضان مختلف السنة دى!!!

انا عن نفسى كل سنه رمضان بيختلف عن السنه اللى قبلها

بس السنه دى الاختلاف مش فى صالحى او بمعنى تانى مش مفرحنى

يمكن علشان لسه فى اول يوم ؟؟

بس المفروض ان يكون احساسى زائد فى الاول بس انا لالالا :(


هو انا مش عارفه افكر ليه وايه السبب فى الاحساس دا

بس اتمنى ان بمرور الوقت يتغير واقدر أكون أنا من غير تغيير او احساس مختلف

هحــــــــــــــــــــــــــــــاول على قد ما أقدر أنى أكون أنــــا


سلامى

رمـضــــــ كريم ـــــان

السلام عليكم ورحمه الله وبركاته

رمضان كريم عليكم اجمعين

سعيده كتير لان دا تانى رمضان يمر على مدونتى

وقد ايه سعيده وفاكره مواضيعى السنه اللى فاتت

وكل يوم كنت بنزل بوست بدعاء او حديث شريف :)



والله انا فى نيتى السنه دى مشروع جديد بردوا ربنا يقدرنى واتمه ان شاء الله

وهيبقى كل يوم بردوا موضوع





هزعل من نفسى جدا لو مستفدش برمضان السنه دى

وانى اخرج منه وانا صفحة بيضاء من كل حاجة

واكيد كلنا هنزعل من نفسنا على كدا

خلونا نحاول نقرب من ربنا مش نبعد

وخلينا دايما دايما فاكرين ان الله سبحانه وتعالى ارحم الراحمين بعباده

ويكفينا اعطاءه لينا شهر رمضان للرجوع فيه لله عزوجل

وياريت السنه كلها رمضان

ومن قبل ما يبدأ رمضان حاسه انه هيوحشنى جدا

وكأنه ضيف عزيز وخايفة اوى من لحظة الفراق ...



إن شاء الله ناويه اختم القرآن مرتين وربنا يقدرنى :)

وفى نيتى حاجات تانيه كتير

الله المستعان

رمضــــــــــــــــــ كريــــــــــــــــــــــــــــم ـــــــــــــــــــــــــان

هرجع الشريط بس+ تحديث

السلام عليكم


حد فاكر
حبيبة ونادر
!!!

انا نفسى مش فاكرة D:
هقراها تانى
وادخل اكتب الموضوع المتاخر شهرين دا

+++++++++++++++++++++++

آسفة جدا جدا جدا
بس الموضوع هيؤجل لبعد رمضان ان شاء الله
رمضـــــــــــــــــــــــــ كريــــــــــــــــــــم ـــــــان

سلامى

بين هذا وذاك

السلام عليكم

هو انا بصراحة مش عارفه انا فتحت البلوج ليه

وفتحت انى اكتب حاجة جديده بس معرفش هى ايه

هو انا اتغيرت بنسبه قد اييييييييييه

يمكن محدش يقدر يجاوب على السؤال دا غيرى

بس انا نفسى مش عارفه انا وصلت لحد فين

حاسه ان الدنيا بقت مختلفه فى كل حاجة

ولا حزن مأثر ولا فرح مأثر بردوا

ناس كتير بتشوفنى غير اللى جوايا

طيب دا غلطى انا ولا غلطهم

طيب لو مهتمش بيهم ولا بكلامهم ولا بنظرتهم

الحياه هتكون ازاى , هعيشها لوحدى من غير مشاركتهم

انا مبقتش بحس بطعم اى حاجة حلوه بتمر عليا

ممكن اكون من جوايا محتاجه اعاده ترتيب او ريستارت لكل حاجة

.....................

ساعات بحس ان الناس بتقصد انها تكدب قدامى علشان تاكدلى كدبهم

او ممكن تشككنى فيهم ساعتها بتصدم بس مش دايما فى ناس اتعود منهم على كدا

طيب وليه الكدب اساسا طيب ما اقرب حاجة انتى بتحطى نفسك فى موقف وحش معايا ....

كنت بقول انى عايزه أبدأ حياه جديده بكل حاجة

بس انا اكتشفت انى اساسا اللى فات مكنتش عايشاه ولا شيفاه كويس

ساعات بحس ان كل موقف بيمر عليا مجرد حلم سريع وبفوق منه بسرعه اوى

لدرجه انى مش قادره افرق ما بين الحلم والحقيقه , ما بين الضحكة والدمعة ...

رتم الحياه بقى سريع بشكل فظيع وكل حاجة بتضاعف مش بتقل .

الشهر اللى عدى دا كان غريب اووووووووووى بس بحمد ربنا انه مر مهما حصل فيه

نفسى اسافر فى أى مكان بعيد بس مش كالعادة أنى اكون لوحدى

المره دى محتاجة حد معايا , لانى ببساطة بقيت أخاف موت أنى اكون لوحدى ...


...............................................................


أنا
مش
مبسوطة
خالص
عن
حاجات
كتير مرت

......................
أنا محتجالك يارب

قدرى والحمد لله

السلام عليكم

الحمد لله رجعت بيتنا

دا اقل حاجة ممكن اقولها بجد الحمد لله

امبارح المفروض كان يوم الهندسه المصرى

فى الاول كنت مصممه انى اروح وخاصا ان فى بنات هتكون موجوده

وحابه اقضى اليوم معاهم

وبعد كدا حصل موضوع ان النت فصل اسبوع ومكنتش اعرف اى اخبار جديده عن الرحله

ولما رجع النت ولقيت ان كل الناس اشتركوا ومحدش اتصل ولا عرفت حاجة

بصراحة

قولت مش طالعه واضيقت من الموقف

ورجعت تانى قولت لا بدام فيها رحله وتصوير وتغير جو وخاصا ان خلاص مفيش دراسه تانى

وفى ناس كتير ممكن مش اشوفهم تانى قولت خلاص اطلع وخلاص

ولحد يوم الاحد الساعه 11 بليل ولا كنت حضرت اى حاجة ولا عارفه هعمل ايه بكره

وكان عادى ولا فى دماغى

يوميها معرفتش اها نهائى وكتبت الاستيتس دى الساعه 2 بليل على الايميل

والساعه 7 الصبح حصل اللى حصل

بصراحة انا مش حابه افتكر ولا احكى لانى كل ما بفتكر بتعب

ولحد دلوقتى مخضوضه جدااااااا ومش مصدقه اللى حصل

هو كل اللى حصل بالظبط

انى شنطتى اتسرقت فى وسط الشارع وفى ناس واقفه

اةةةة بقى عادى الموقف دا يحصل متستغربوش نهائى

وكان تقريبا الحاجات اللى فيها ممكن تعمل 1200 جنيه

بس بجد انا مزعلتش عن اى حاجة ضاعت

انا بس اللى ضيقنى الكاميرا بس

كل حاجة تهون بجد الا الكاميرا :(

بصراحة انا فكرت ارجع واخويا قالى ارجعى بس انا لو رجعت كان اليوم هيبقى درامى بحت

علشان كدا اصريت انى اروح واكمل مهما حصل علشان مش حابه اضايق اللى فى البيت

كان نفسى اليوم ينتهى زى ما كنت اتمنى بس الحمد لله

وقدر الله وماشاء فعل

اكتر المواقف اللى ضحكتنى فى الرحله

كل ما حد يسألنى عن حاجة أرد

كان معايا

كان معايا فى الشنطه

كان معايا

مبسوطه انى شوفت ناس كتير من الكليه امبارح

وكان نفسى اتعرف على كل الموجودين

بس الحمد لله

دا قدرى وانا راضيه بيه

هسيب التعليقات مفتوحه علشان فى ناس بتزعل لما بقفلها :)

سلامى