آراء ... مسأله آراء

السلام عليكم

هو ليه كل حاجة فى الدنيا طعمهما اتغير والاحساس بيها اتبدل !!!

يعنى حتى شويه اكتئاب عايزين ندخل فيهم مش عارفين... الله مش عيب كدا !!!

هى كل الناس مالها كدا زهقانه وقرفانه ليه ومش عارفه تعمل حاجة صح
ولا انا بتهيألى ولا الناس بتضحك عليا طيب؟؟؟

دا انا حاسه انه ممكن الاقى جروب على الفيس توك او مدونه باسم

"" للمكتئبين فقط ومش عايزين حد بيبتسم فى المنطقه دى والا هو او هى حر كله يلزم الاكتئاب والعبس منك لها وليها""


والله انا عارفه ان الدنيا بقيت صعبه اوى حتى علي الشباب اللى حتى موصلش 20 سنه زهقان وبحس ياعينى ان الاكتئاب مسيطر عليهم

بس هو الحل ايه بالظبط ؟

اننا مثلا نعمل جروب ولا مدونه ولا اننا نقعد نشتكى طول الليل والنهار والبنى ادم هو هو مفيش حاجة هتتغير

ما يمكن العيب فينا قبل ما يكون العيب فى الدنيا او المواقف اللى بنمر بيها

ليه بقينا ضعاف حتى قدام نفسنا ليه الناس بقت تحب ترسم نفسها اوى حتى قدام نفسها

انتو متخيلين ان النفاق يصل الى ان كل واحد بقى ينافق نفسه قبل الناس, ايه اللى وصل الحال بينا لكدا؟؟؟

على فكره مش عيب اننا نحتاج للناس معانا بس الاهم من الاحتياج هو التفكير هو انا محتاج مين معايا وليه ؟؟

محتاج حد تفكيره كويس يساعدنى ويعلمنى اشوف الامور ازاى
ولا محتاج حد طيب وحنين يطبطب عليا وانا موجوع ويهون
ولا محتاج حد ذوى عقل يفكرلى ويوضحلى الدنيا
ولا محتاج ولا محتاج ولا محتاج

انا مقتنعه ميه فى الميه ان ضعفنا من جوانا اقوى ما فينا طيب ازاى؟
يكيفنى ويكفيك ويكفيكى انك فكرت مع نفسك وقدرت توصل لنقطه ضعفك
بدون ما تنافق نفسك مش دا بردوا يعتبر قوه مش ضعف...


لو حد عنده اقتراح ازاى الناس تقدر تخرج من اللى هى فيه ياريت يقوله فى موضوع عنده فى مدونته
او باى طريقه كانت اهم حاجة يوصل فكرته ووجه نظره

سنعود بعد قليل

.

.

.

.

.

.

.

.

.

.

.

.

.

.

عدنا

هتكلم شويه بقى عن الكليه والكام شهر اللى مالهم كدا مرخمين ليه كدا ومش حابين يعدوا واحنا مبسوطين فيهم

طيب حد يقولى بس المطلوب ايه اللى يتعمل بس علشان الواحد يقدر يمسك كتاب ويذاكر

ويحس انه مستمتع بالمذاكره وبأخر ترم فيكى يا كليه...

بدور على اسباب الفشل ( اسمحولى اقول فشل لان حاسه ان الحال بقى كدا فعلا معايا ) اللى وصلنا ليه
وان مخنيش الظن ان دا حال ناس كتير اوى حالك انت وحالك انتى وحال معظم اللى يمكن يكونوا صرحين شوي
ومش بيذاكروا فى الخفى كدا وقدام الناس ياعينى علينا وشويه هبقى اعيط بدل منهم

أنا
نفسى
أذاكر
بس
أزاى

ومحدش يقولى دى حاجة بتنبع منك انتى والمفروض انتى اللى تقررى ودا مستقبلك ومحدش هيفيدك فيه
لو حد ناوى يقولها يبقى بلاش ... اه انا بحب الفلسفه بس مش للدرجه دى :(

احنا رضينا بالكليه سنين بس انا جيت على الاخر ومبقتش مستحمله اى حاجة فيها او منها
فى اسباب شويه برافيت بسبب الصحاب
بس السبب العام والاهم انه مبقاش فيها حاجة تدعو للتفائل وحب الدراسه فيها وانا نفسى الاقى ليها حل بجد !!!


ربنا يهون


عايزه اسمع آراء
سوووووووو
سيتم فتح الكومنتس :)

سلام