وأخيرا وبعد طول انتظار + شويه كلامى

السلام عليكم ورحمه الله وبركاته

ايه بقى فجأه يوم الخميس!!!

أخيرا وبعد طول انتظااااااااااار
خطوبه اسلام اخويا الكبير
كبير العيله بقى D:
الحمد لله كان يوم الخميس قرايه الفاتحه ودبل
كان يوم حلو اوى الصراحة
كنت فرحانة بيه اوى
واخيرا يعنى اخد القرار وقال خلاص هى دى :)


عقبالكوا جميعا ان شاء الله

.......................................................

أنا بقى
وعن نفسى
ونيابه عن ذاتى
جوايا مليون احساس فى بعض

ممكن اكون فرحانه اوى
وحزينه اوووووووووى
وممكن اكون مخنوقه اوى
وجايز مصدومه جدا
وربما عندى احساس بالانهزام
واذ يمكن بحس ان الحياه بقت الحمد لله بخير
وساعات بقول دا الهدوء اللى بيسبق العاصفه

بحس انى مليش هدف فى الحياه
وممكن يكون جوايا مليون هدف جوايا نفسى احققهم كلهم
بحس انى مهزومه وضعيفه
وممكن احس ان قويه جدا ومش ممكن اتهزم فى اى موقف
بحس كتيرررررر انى لوحدى مهما كان حواليا
وممكن اشعر ان فى ناس كتير بتحبنى وتتمنى انى ازورهم او اقبلهم
بحس ان فى حاجات كتير بتتفرض عليا ومش قادره اختار ولا اميز
وممكن احس ان ليا مطلق الحريه فى كل حاجة وان محدش بيناقشنى فى اى قرار
بحس ساعات انى حزينه وغاويه ازعل نفسى
وممكن يكون كل هدفى انى اضحك واخرج واهزر واسمع الناس لو حابه تتكلم وتشكى كمان لو عايزه


جوايا مليووووووووون حاجة متلخبطه
بس مجرد ان لو اى حد من صحابى مس الكلام دا باى تلميح
كل ملامحى بتتغير وبتمنى محدش يفتح معايا اى كلام
حاسه انى حبيت دفن الكلام جوايا ومش حابه انه يطلع لان خلاص وقته ضاع
ومفيش حاجة بتمرممكن نرجعها تانى



الكلام مش مترتب
ومش وقته بعد الخبر اللى فوق دا
بس اول مره من فتره افتح البلوج واكتب الكلام الكتير دا

وحشنى كلامى وقلمى جدا الصراحة
بلاقى نفسى مع قلمى لما بكتب
:)
سلامى

لسة عايشة

السلام عليكم

:)
وحشنى البلوج اوى

كنت بدور فى المواضيع القديمه
لقيت انى بعرف اكتب وارغى كتير
:)

الغريب انى دلوقتى بقيت حتى بنسى انا كتبت ايه
وممكن كمان مزورش المدونه كل شويه
ولا بقيت عارفه اكتب عن اى حاجة بتحصل
...
...
حاسة بحاله من فقدان الشهية لكل الناس انها تكتب اى حاجة
او الناس ملت من البلوج وبقت طول اليوم فاتحه الفيس فقط
...
...
يوم الثلاثاء زى النهارده
النت فصل ومرجعش غير امبارح
يعنى اسبوع كامل
محاولتش ادخل نت من موبيل
محاولتش اعرف اخبار اى حاجة
ومحدش حاول يعرف اخبار اى حاجة بردوا :)

علشان كدا بقول وما الفرق إذن
SO What
?
s:

بس اتعلمت حاجة بقى فى الاسبوع دا
ان محدش يعتمد على حد فى حاجة ولا يخلى امل عنده ولو لواحد فى الميه
لما يكون متفق على حد على حاجة وفى الاخر انها تتم زى ما هو متوقع
الواحد بيتعلم بردوا :)
...
...
يوم الخميس فى فجأه حلوه
هتكلم عنها لما تتم ان شاء الله
:)

...
انا كتبت البوست دا علشان اقول انى
لسه عايشة
...
فى دماغى بوستين
لما ان شاء الله هكتبهم هنزلهم
على الاقل علشان اشيل التراب من على البلوج هنا

سلامى

فاتت سنين ...

السلام عليكم

يااااااااااااااااااااه

3 اسابيع مكتبتش حاجة هنا

بجد وحشنى البلوج والرغى اوى

بس حاسه ان الناس كلها سكتت

حاسة ان الكلام جوايا كمان سكت

بصراحة الكلام بقى يوجع اوى

والكام اسبوع كان فيهم مواقف تشيب

وكلام يزعل ويزعلنى من نفسى قبل ما يزعلنى من حد تانى

بس اقدر اقول ان بجد انا اتعلمت كتيييييييييير اوى اوى

والحمد لله المره دى حاسة بغلطى قبل ما احس بغلط اللى قدامى

يمكن علشان كدا حاسة انى مش عايزه اتكلم فى اى حاجة فاتت

عــــــــــــــــــــــــــــــــــــــــادى بقى

المفروض انى اتعود على كدا خلاص

او المفروض اتعودت كمان

يووووووووووووووووووووووووه

انا اساسا داخله علشان اقول انى نجحت

الحمد لله ودعنا الدراسه والامتحانات بالامر

والسكاشن والمحاضرات والمعيدين والمعيدات

وكــــــــــــــــــــــل حاجة خلاص خلصت

ناقص موضوع التدريب وربنا يقدم اللى فيه الخير

كنت مبسوطه جدااااا النهارده علشان الكل كان مبسوط

وكل اللى اعرفهم نجحوا وكله تمام

مبروك لكل فرقه 4 حاسبات الزقازيق من كل قلبى

وربنا يوفق الجميع وبالتوفيق دايما

اه صحيح الصوره دى نتيجه سنه رابعه والتقدير التراكمى حبيت احتفظ بيها :)

وحشنى البلوج جدااااااااااااا وقد ايه مفتقده فعلا كلامى فيه

جوايا كلام كتير اوووووووووووووووى بس ملوش لازمه

سلام

كلام

دا النصب التذكارى
دا المنظر من شباك الاوضه بتاعتى بصراحة كان يجنن اووووووووووووووى :)

دا الغروب بس الكاميرا مكنتش حلوه اوى علشان اعرف اصور

السلام عليكم

سؤال

هو ازاى ننسى صدمة مرت

ودى مش عمرها يوم او يومين

دى 4 سنين؟؟؟

...

ادور على حد احكى معاه

والله نفسى

نفسى فى حد امسك ودنه كدا ومسبهاش

واقعدك لوك لوك لوك لحد الصبح ومحدش يقولى بس

بس الاقى حد يرد ميبقاش زى شريط الكاسيت بس

بيسجل بس من غير ما يرد ولا يدى اى رد فعل :(

...

ناس كتير بتحسدنى على الكام يوم اللى مرو سافرت فيهم

لو تعرفوا حالتى كانت ازاى قبلها وكنت عامله ازاى

طيب انا ذنبى ايه مكنتش اسافر علشان اعجب وميزعلوش يعنى

دى كانت ايام فووووووووووووووووووو

يااااااااااااااه الحمد لله ايام ربنا ما يعدها تانى ابدا عليا او على غيرى

الحمد لله على كل حال

ومقدرش اقول الا ربنا يهدى وكلها كام يوم وكل واحد هيبقى مش فاكر التانى

دا مش تشائم على فكره دا احساسى

اصل محدش يعرف اللى فيها ولا اللى حصل

ودى حاجة من ضمن صدمات 4 سنين

حتى الذكرى الحلوه محوها حاسس وكانها لم تكن اساسا

ربنا يهــــــــــــــــــــــــــــــــــــــون

...

بس انا مستغربه من الحال والوضع اللى وصلت ليه

مش مبسوطة من الاخر

بس غالبا ما بدأت اتعود على كدا ومبقتش استغرب اى جديد

دا حتى زعلى وفرحى مبقاش زى الاول

ناس كتير بتقولى انتى مالك ومبقتيش زى الاول وضحتك راحت فين ووو

مبعرفش ارد عليهم فى حاجة والرد المعتاد الحياة بيس اهون ومفيش حاجة D:

بس اللى جوايا جوايا

يمكن اكون زعلانه على حالى اللى وصلت ليه

يمكن زعلانه على مواقف وحشه كتير كنت فيها ورغم انها مرت بس لسه مأثره فيا

يمكن مضيقه لان كل اللى كان نفسى فيه راح ومبقاش موجود

يمكن لانى مبقتش اعرف اقول حاجة خالص

يمكن ندمانه على 4 سنين مروا ومن كل قلبى بقول انى معرفتش اعشهم اساسا

ومكتشفتش دا الا فى اخر شهر بس من الكليه !!!

...

حاسة وكأنى بلف فى دايره ومش بخرج منها

علشان كدا حاسة ان كلامى دا مكرر وقولته قبل كدا

ودا اكبر دليل ان الدنيا وان كانت اتغيرت وانا اتغيرت معاها فمش عارفه للاوحش ولا الاحسن

بس هى اتغيرت لعكس ما كنت بحلم فى كل حاااااااااااااجة :(

....

الصور اللى فوق دى من مطروح

نسيتها البوست اللى فات

ذكرى بردوا وعمرى ما هنساها

كانت ايام مختلفه فى كل حاجة :)

....

سلامى

ايه اللى حصل بقى بالتفاصيل :)

السلام عليكم

اولا كدا ربنا يكون فى عون الناس اللى بتمتحن فى الجو دا

احنا ربنا رحمنا :)

...

احكى بقى عملت ايه فى الكام يوم اللى سفرت فيهم

...

بعد ما خلصت امتحاناتى جت ليا فرصه سفر تقريبا كدا يومين مش طويله اه بس قولت تغيير جو بردوا

واقنعت اخويا بالعافيه انه يغير مواعيد شغله واروح انا وهو وسافرنا

خرجنا من البيت 7 الصبح يوم الاربعاء من البيت الى القاهره ومنها الى مطروح

وصلنا مرسى مطروح الساعه 5 العصر تقريبا

على ما روحنا مكان الاقامه واستلمنا الشقه واتغدينا وبعدين خرجنا على 9 كدا قولنا نشوف البلد عامله ازاى

اخر مره روحت فيها مطروح كان من 10 سنين طبعا البلد اتغيرت كتييييييير اوى عن زمان دلوقتى

تتسمى مصيف بجد مش زى زمان

خرجنا اتمشينا على الكورنيش شويه وبعدين انا متفقه معاه اننا ندخل سينما وفيلم عسل اسود بالاخص

اخترنا السينما اللى فيها عسل اسود وعرفنا انه هيبدا على 11 ونص لفينا شويه وبعدين دخلنا الفيلم

هما فيلمين مع بعض كان الديلر وعسل اسود

خلصنا سينما على 4الفجر روحنا ونمنا شويه

تانى يوم يبدا من 8 صباحا روحنا الزياره اللى هى سبب اننا روحنا اساسا

خلصنا الزياره على 1 الظهر روحنا وخرجنا تانى على 6ونص كدا روحنا البحر

قعدنا ساعه ونص وبعدين رجعنا تانى وجهزنا نفسنا اننا نروح لاخونا هناك فى شقته نزوره

روحنا قعدنا معاه ساعتين ومشينا علشان شغله الصبح

واتمشينا شويه فى شوارع البلد

وفيلم اللمبى 8 جيجا كان نزل فى السينما هناك

قولنا ندخله وياريت يكون عسل اسود معاه وفعلا دا اللى حصل

اتمشنا على الكورنيش وقعدنا على الكورنيش وشغل ليا اغنيه ام كلثوم دارت الايام :)

بس للاسف ميعاد السينما قرب , روحنا نلحق الفيلم من اوله

اتفرجت على عسل اسود تانى D: وشوفت اللمبى 8 جيجا

احلى فيلم فى التلاته عسل اسود فيلم يجنن بجد

الديلر مش حلو نسخه مكرره من افلام احمد السقا قصه الفيلم حلوه بس تمثيل السقا مبالغ فيه اوى

وبردوا اللمبى تقريبا قاصص مشاهد من الافلام اللى فاتت ولزقها تانى فى فيلم

بس فيه كام مشهد كدا حلوين :))

خلصنا يوميها سينما الساعه 5 ونص الفجر خرجنا اشترينا شويه حاجات للسفر

ورجعنا نمنا ساعه ونص وركبنا الاتوبيس رجوعا للقاهره ومن القاهره الى الشرقيه واخيرا الى بيتنا

وتوته توته خلصت الرحله :)

كانت رحله مرهقه وتقريبا 3 ايام مفيش نوم فيهم غير 6 ساعات بس هو دا احلى ما فى الموضوع

بس كانت حلوه اوى سريعه والواحد غير فيها جو بردوا

بصراحه كنت محتاجه الموضوع دا جدا لان كنت حاسه انى بموت بالبطىء

ولانها صغيره اوى حسيت انها كانت حلم وصحيت منه :))

يلا كل فسحه وانتو طيبين :)

سلام

عدنا الى ارض الوطن

السلام عليكم

...

...

عدنــــــــــــــــــــــا

التفاصيل بعد الفاصل بقى

على ما اقدر اجمع D:

فاصـــــــــل ثم نواصــــــــــــــــــل

alsalam 3alekom

...

...

Be

Right

Back

...

SALAM

:)

بقايا أمس

السلام عليكم

...

...

فى غرفتها جالسة

واضعه رأسها على ركبتيها

وعلى نظارتها قطرات دمع تحجب رؤيتها

كل قطره تترك أثر على نظارتها فتحجب رؤيتها

وعندما رفعت رأسها

رأت نور الصباح وهو يشرق من جديد

يودع ظلام الليل الاسود

,,,

,,,

ولـــــــــــــــكن

ما حدث فى ظلمات الليل

مازال يؤثر فى نظرتها لفجر اليوم

فمازالت بقايا الدمع تاركة أثرها على نظارتها

وان تركت نظارتها , هل ابتسامتها هستودع مثلما كانت

هل عينها ستنسى دموع مازالت تأثر على جفنيها

هل ستنسى تلك الظلمه التى باتت فيها لسنوات !!!

هل للماضى أن يُمحى بكل اوهامه وظلماته

لطالما أردت ذلك ولكن هيهــــــــــــــــــات

سنترك الايام تتموج بيها مثلما شاءت

ولربما ترسيها على شاطىء الادراك

,,,

...

تخــــــــــــــــــــــــــــــــاريف

ضوء خــــــــــــافق

I Miss My Self

I Miss My Self

I Miss My Self

I Miss My Self

I Miss My Self
!!!

حاسة انى مش لاقية نفسى

حاسه انى تايه

مفتقدة حاجات كتير

احساسى بالحياه ... ضايع

...

اوقات يادنيا معاكى بعيش وساعات مبفهمكيش

وانتى ولا فهمنـــــــــــــانى

...

اوقات فى عز العتمه بشوف

وساعات بموت من الخوف

وغصب عنى بدارى

...

اوقات بتاخدى اعز الناس واقول نصيبه خلاص...

اوقات بحب قلوب بتبيع وفى الف لحظه بضيع

وبردوا مش حسانى

...

ضوء خافق وشمس زائفة...

السلام عليكم

...

العنوان مفيش اى علاقه بينه وبين الكلام اساسا :(

...

مش عارفــــــــــــــــــــة أذاكـــــــــــــــر

لسه مبدأتش فى مــــــــــــــــــادة بكرة

أعمـــــــــــــــــل إيـــــــــــه بس :((

انا زهقانـــــــــــــــة أوى ...

وآخرتـــــــــــــها زى أولها انا عارفة

مش جديــــــــــــــــــــــــــدة الحكاية :(

يــــــــــــــــــــــــــــــــــــــارب هونها علينا الفترة دى...

الحـــــــــــــــــــــــــــــــــل إيــــــــــــــه؟؟؟

منه لله اللى كان السبب