شخبطة

السلام عليكم ...

من الصعب ان تجد احدا يشعرك انك فوق السحاب مرتيـــــــــــــــــــن 




فبعض المواقف لا تتكرر مرتين 
كذلك الاشخاص كلا له تأثيره وبصمته فى حياتك ولا يتكررون فى حياتك


كــــــــــــــــــــــــن كما أنت واتركهم يتغيرون امامك مثلما أرادو 
فسيأتى يوما يعودون فيه الكره وعندها سيتذكرونك ,عندها لن يتعرفو على انفسهم مثلما سيعرفونك 
سيرون اشباح لانفسهم اما انت فستظل فى بريقك تلمع لانك كمـــــــــــا أنت


كن مرآة نفسك حتى لا تنخدع فى كلماتهم واصواتهم وعباراتهم معك

نفسى تحصل كل حاجة وعكسها مع بعض

أنا بقالى اكتر من 4 ساعات فاتحة الصفحة ومش عارفة اكتب ايه 




بس حاسه انى متلخبطة جوايا كلام كتير اوى بس مش عارفة اقول حاجة منه 


نفسى اقعد ارغى ارغى ارغىىىىىىىى كتير اوى بس محدش يسمع الكلام منى :D
حاسة انى صح ومن جوايا ندمانة اووووووى على مواقف كتير عدت :((

نفسى اتكلم فى السياسية رغم انى مبحبش اتكلم فى السياسة 
نفسى اتكلم مع الناس اللى ماتت فى التحرير واعرف هما ماتو ازاى
ومين صح ومين غلط وياترى مين صح الفوتوشوب ولا الحقيقة قدمنا 
واحنا اللى بنحسبها جرافيك؟؟؟
نفسى اتكلم عن مواقف بتحصل فى حياتنا رغم انى مش حابه افتكرها 
نفسى اتكلم مع ناس بس للاسف مينفعش انى اتكلم معاها 
نفسى اضحك اووووووووووووووووى رغم ان مليش نفسى
نفسى اعيط اوى رغم انى مبقتش احب الضعف
نفسى اخرج مع صحابى رغم انى لوحدى هكون مبسوط اكتر
نفسى ابعت رسالة لناس صحابى بس مكسوفة وخجلانة اعمل كدا
نفسى فى حد يجى يشتغل معايا فى شغلى رغم انى لوحدى مبسوطة اكتر بكتييييييير 


أنا عايزة كل حاجة وعكسها تحصل فى نفس الوقت عشان اجرب طعم الحاجتين مع بعض 
يعنى واحدة تكون بالجبنه وواحدة بالعسل :)))))))))))))))))))


معرفش ايه الجنان اللى بكتبه دا بس هنشره عادى جدااااااااااااااا 
اظن مش جديد على مدونتى النوع دا من الكلام الغير مفهوم خالص




نفسى ارجع اكتب تانى جداااااا وفى نفس الوقت نفسى احذف كل حرف كتبته قبل كداااا 


نفسى اقوم انام ونفسى اسهر عشان بكره الجمعة وحابه احس بيوم اجازتى بالسهر :)))))))))))))))))))))))))))))
صباح الجنان على مدونتى الغالية

السلام عليكم ورحمه الله وبركاته 

وحشتــــــــــــــــــــــــــونى 

وحشنى اللوك لوك لوك بتاع زمان

رغم ان مفيش اى تغيير ولسه الواحد عنده وقت فراغ كبير اووووووووى ممكن يرغى زى زمان

مش قادرة احدد المشكلة فين بالضبط وممكن تكون دى مصلحة من كتر الرغى بتاعى

بتمنى ان كل الناس تكون فاين وكله بيس ومفيش حد عنده اى بروبليم :DDDDDDDDDDDDD

كل سنة وانتو طيبين العيد بعد كام يوم وعيد اضحى مبارك على الامة الاسلامية 
كلها ان شاء الله 

وحشنى احساسى فى وسط البلوجات :))))))))))))))))))

oLiVeTrEe

سلام

MiSs EvErYThInG

السلام عليكم ورحمة الله وبركاته

صباح الخير ومساء الورد بكل توقيتات العالم
وحشتونى بكل لغات العالم
ووحشنى احلى كلام ملخبط ودردشة وفضفضة من القلب
ورغى السنين اللى كنت بعمله

وحشتنى بوستاتك وقصصك يا روان :))))
وحشتينى يا مورجن والتعليقات الكتير اللى كنا بنعملها :)))))))))
وحشتينى يا شيمو وكلامك وبوستاتك الغامضة :)))))))))

مفتقدة حاجات كتير اوى فعلا
الحياة اتغيرت كتيرررررررر اوى مابين الكويس واللى ....
وأحلى حاجة ان الواحد راضى بيها كدا او كدا يعنى مش متأثرين أوى
وأسهل كلمة تتقال عــــــــــــــــــــاتى وشوية تفكير وحبة زعل بساط على السريع كدا اذا الامر لازمه طبعا شوية نكد اصله بهارات الحياة عندى DDDDDDDDD:

//
وحشتنى اوقاتك وحشنى حبيبى حكاياتك عليك طمنى وحياتك وايامك عيشها ازاى
من قلبى بتمنى ميعاد بنا يجمعنا مليش غير ان انا استنى وهفرح لما اشوفك جاى
//
بحب انا التون دى اوى وبفرح لما بسمعها :))))))))))))))))


وادينا نفضنا التراب من على البلوج يا مورجن ورشينا ميه كمان ونضفنا المكان
أى خدمــــــــــــــــــــــــــــــــــــــــــــــــــــــــة
:)



سلامى لأحلى ناس اتكلمت معاها
:)

sometimes i feel myself

السلام عليكم ورحمه الله وبركاته

كل سنة واناطيبة D:

عجبنى أوى رقم 22 وبقول نثبت على كدا بقى
رقم لذيذ وظريف ومفيش زيه ومش هنشوفه تانى
هنحطه فى لوب ويبقى كونستانت فور ايفر أحسن
.............

عارفيـــــــــــــــــــــن
أحسن راحة فى الدنيا دى راحة البال والنفس
مش بالغنى وانك تنام اخر اليوم وفى محفظتك الف جنيه
 ولا انك تنامى كل يوم وفى شنطتك اللى يكفيك انك تشترى كل يوم طقم جديد

بجد أنك تنام كدا خالى البال ولا شايل هم شىء فى الدنيا غير صلاتك
ووواجباتك فى الحياة
وبتحاول على قد ما تقدر انك تقوم بيها
أحسن بكتير من انك تنام وشايل هم سنين
وايام جاية ونايم تضربها أخماس فى اسداس

انا ليه بقول الكلام دا
لانى راحة البال مش بتتبعت ليك على البلوتوث
لينك فى رسالة ولا شير على الفيس
دا نابعة من جواك من  قلبك وعقلك ووجدانك وشعورك بالحياة كلها ...

ربنا يزرقنا جميعا راحة البال وطمأنينة النفس ان شاء الله
...................
.................

حاجة برايفت بقى
امبارح
كان عندى هستيريه ضحك
الغريب ان ضحكى دا كله على حاجات كانت زمان بتضيقنى جدا وتوصلنى لحالة اكتئاب رهيبة
دلوقتى بقيت كل ما افتكرها اضحك اووووووووووى
انا مش زعلانة علشان هى كانت حاجات بضيقنى ولا مضيقة لانى لما بفتكرها دلوقت بضحك ودا مش استهتار بيها
بس اكتشفت ان كل شىء وليه اخر ومش كل حاجة بدوم على حالها
ومع الايام والسنين حاجــــــــــــــــــــــــــات كتير أوى فى تفكيرنا وحياتنا بتتغير
فبلاش نتسرع ونسيب الدنيا تمشى بالمعدل الطبيعى بتاعها لحد ما يحصل التغيير فى الوقت اللى ربنا محدده فيه ان شاء


سلامى

إن شاء الله يدور الموتور :))

السلام عليكم ورحمة الله وبركاته ...

وأخيرا وبعد يوم شاااااااااااق ( مش أوى يعنى)

بس كنت مبسوطه اوى النهاردة ونفسيا مرتاحة جدا جدا

اى نعم مكنتش مركزة خالص لانى منمتش امبارح تقريبا ,

 بس دلوقتى وبعد كام قلم محترم من حبيبة على وشى

والسنفونية بتاعتها على الكيبورد وحبها الرهيب فى الضرب بغيظ

 وبحرقة على الزراير حاسة انى فقت

 انا فايقة اه , بس حاسة ان دماغى فوق فووووق

 فووووووووووووووووووووق أوى D:
....................

بحب أوى أنى اكون مخططة اليوم يمشى أزاى

 ويحصل فعلا اللى انا حباه مش بظبط اوى يعنى بس مبيحصلش حاجة تزعل 

ودى حاجة بتبسطنى أوى ...

ودايما الحاجة بتكمل سعادتها لما تكون مش مرتبط بحد يغير ليك مسار اليوم

يعنى اللى فى دماغك هو اللى هيكون باذن الله طبعا وبمشيئته .

كام مشوار ووجوه جديدة تشوفها وكلها مبتسمه لــــــــــــيك , حاجة بصراحة مفرحانى أوى D: 

متفائلة خير ان شاء الله فى الفترة الجاية دى ,

وان شاء الله ربنا هيوفقنى فى اللى بفكر فيه ...

قاعدة البيت فى حد ذاتها مش مملة زى ما الكل متوقع ,

 بس طول ما الدماغ شغال وفى جديد فى الحياه مش هنحس بالملل

بس الدماغ يشتغل بس دى أهم حاجة D:

يــــــــــــــــــــــــــــارب يشتغل يارب :)

سلام
..........................




  

الحمد لله على كل حال

السلام عليكم ورحمه الله وبركاته

أزيك يا ماى بلوج
مس يو جداااااااااا

.........................
خلـــــــــــــــــــــــــص شهر فبراير ( فقراير)
واللى يعرفنى كويس يعرف أن دا أسوء شهر بيمر عليا فى السنة
ههههههههههههههههههههههههههههههههههههههه
محدش يعرف دا على فكرة خالص
 لان محدش يعرفنى كويس
D:
بس أنا فاكرة انى اكتبت السنة اللى فاتت عن كرهى للشهردا لسببين
بس السنة دى ممكن نضيف عليهم سبب كمان
والسبب الجديد هو ضياع صورة
كان فى صورة عندى بحبها جداااااااا
صورة كنت بحب أشوفها كتير
أتأمل فيها كتير أوى
غالبا كانت عايشة معايا اليوم كله
أى نعم ملامحها كانت بدأت تتغير
وكنت فاكرة ان مجرد ان الملامح بدأت تتغير بس
بس اللى حصل غير كدا لان الصورة نفسها ضاعت للاسف
:(((((((((((((((((((((((
للابــــــــــــــــــــــــــــد
ومفيش أى أمل أنى ألاقيها خالص بعد كدا
بس الحمد لله على كل حال
...
...
...
أنا مبحبش الانتظار
والمثل بيقول وقوع البلاء ولا انتظاره
وانا ايه يخلينى استناه وبعدين كدا كدا هيتعبنى
يمكن الله سبحانه وتعالى بيأخره لسبب ما
الله أعلم
او يمكن انا مبحبش اخد بالمواقف انا بحب اخد بالكلام
الكلام خير برهان على انتهاء الانتظار
بس أنا مبحبش الانتظار خالص وخاصا فى الشر
بدام من جوايا مش مطمنة وعارفة انى هيحصل حاجة مش كويسة ليا
بتمنى تحصل فى وقتها 
عارفة أنى متسرعة جدااااااااااا جدااااا ودا بيخسرنى حاجات كتير
خاصا مع الناس القريبين
بس بردو 
الحمد لله على كل حال 
ومحدش بيشوف غير قدره فى كل شىء 
ومهما أتمنينا وأنتظرنا وعيشنا لحظات خوف وقلق غير نصيبنا مش هنشوف 

...........
الصـــــــــــــــبر
..
عكس التسرع طبعا
بس انت ممكن تصبر لو فاهم الدنيا ماشية ازاى وحاسس انك واقف على ارض ثابتة
ساعتها بتكون صبووووووور وراضى ومطمن وحتى لو حصل شىء عكس اللى بتتوقعه بترضى بيه
ومش جنان انك تجمع ما بين الصبر والتسرع
فى حاجات بتحتاج حل ورد فعل سريع والاجابة فيها أه او لأ مينفعش فيها ممكن
وفى حاجات ممكن الوسطية تمشى فيها
بصراحة مفيش أمثلة فى دماغى دلوقت احكم بيها

..................
رضا بالمقسوم
...
(وعسى أن تكرهو شيئا وهو خير لكم)
أى نعم اللى ايده مش زى اللى ايده
بس دا فى الاول والاخر بيرجع حسب نسبة الايمان
وطمأنينة النفس .
يعنى ممكن نرضى بحياة معينه فى الاول بتكون مش طايق الموضوع
بس بمرور الوقت ممكن تلاقى العلامات اللى تبين ليك ان دا فعلا الخير ليك
وان رضاك باللى حصل هو اللى وصلك للخير دا

.......................

حاسة أنى بكتب كلام غريــــــــــــــــــــب

سلام

بسم الله الرحمن الرحيم... الاجابة مصـــــــــر

السلام عليكم ورحمة الله وبركاته

.... 

محدش فينا هيقدر ينسى الناس دى

أنا عن نفسى صورهم محفورة جوايا

ربنا يرحمهم أجمعـــــــــــــــــــــــين

.......................

على الفيس بوك فى صفحة سألت سؤال تحب تقول ايه للرئيس السابق

وليس المخلوع

كان ردى

ربنا يتولاك ويتولانا برحمته إن شاء الله

أنا بحترمك لكبر سنك, لشيبة رأسك اللى مشوفهنهاش 30 سنة

بس دم الناس دى هتفضل قدام عيونا كلنا

........

أنا نفسى أى تعليق كنا بنقوله او بنعمله كنوع من انواع التريقة على

النظام او الرئيس

ياريت نحذفه

احنا وصلنا للى عايزينه

وصلنا لرسالتنا لكل فاسد وظالم

ان مهما عملت ليك يوم ربنا ينصر عليك الحق

عايزين نبدأ عصر جديد

وننسى الاساءة اللى حصلت

ورسالتنا متكنش شتيمة او سب

خليها تبقى دعاء

كفاية ندعى ان ربنا ينصر البلد دى ويحميها من كل شر...

....

عن أحساسى الشخصى

أنا عن نفسى مش عارفة أفرح زى باقى الناس

ومش مبسوطــــــــــــــــــــــة بالمرة

يمكن لان الفرحة وأنت لوحدك محدش معاك ملهاش أى طعم

الله أعلم

.................

ربنا يصونك يامصر

وإن شاء الله شبابك يبنو فيكى كل جديد وكل ما يرضى ربنا إن شاء الله

دومتى فى رحمة ربنا يامصــــــــــــــــــــــــــــــــــــــــــر

.............

وحشنـــــــــــــــــــــــــــــــــــــــــــى البلوج جدا جدا جدا جدا جدا جدا

أنا آسفة انى مكنتش بلجأ ليك فى عز محنتى بس للآسف أتعودت على الصمت للآسف

سواء فرحى ولا حزنى مبقتش أعرف أكتب حاجة

حتى الكلام على الميل بقيت أستغربه

................

سلامى

مفيش فايدة ...

السلام  عليكم


سعد زغلول قال مفيش فايده
وانا هفضل اقول بقيت عمرى مفيش اى فايدة :(




مفيش فايدة
مفيش فايدة
مفيش فايدة
:(




شويه اكتئاب وراجعه
:(
:(
:(

ربما بآخر دقيقة , قد تبدأ بك حياة جديدة 2

السلام عليكم
.........................

العنوان دا كتبته من كام يوم
فكرت كتير فيه وبعدين كتبته
بس مفيش 5 ساعات وعرفت معناه ايه عندى على الاقل
فعلا
باخر دقايق او ساعات او ايام تبدأ حياة جديدة بس للاسف مش ليك
لشخص تانى هيكمل مكانك ...

ياااااااااااااااااااااااه
أسوء خبر ممكن تصحى عليه انك تصحى على خبر وفاة حد قريب ليك
حد تتصدم لما تسمع الخبر عنه
حد لسه محسش بفرحة قلبه بأبنه اللى مكملش 3 شهور بعد سنين حرمان منه
سبحان الله ...


كلام كتير نفسى اقوله بس خايفه يكون حرام
:(

بس فعلا
الدنيا عمرها ما بتضحك لحد مره واحدة كدا ,,, الحمــــــــــد لله